Цирк санъатини ривожлантиришга эътибор кучайтирилмоқда
Айни кунларда мамлакатимизда ижодий бирлашмалар фаолиятининг устувор йўналишларини белгилаш, иш самарадорлигини ошириш, ижодкорларни қўллаб-қувватлаш ҳамда соҳа ривожи учун янги имкониятлар яратишга алоҳида эътибор қаратилмоқда.
Шу мақсадда цирк санъати ижодий бирлашмасининг фаолияти ҳам ўрганилди. Унда Ўзбекистон Республикаси Президентининг маданият бўйича вакили Ҳасан Салихов, маданият вазирининг биринчи ўринбосари Нодирбек Сайфуллаев, цирк санъати ижодий бирлашмаси ижрочи директори Рустам Хаметов, соҳа мутахассислари ҳамда ҳомийлар иштирок этди.
Учрашувда Цирк санъати ижодий бирлашмасининг жорий фаолияти, амалга оширилаётган ишлар, мавжуд имкониятлар ва истиқболдаги режалар муҳокама қилинди. Хусусан, томоша дастурларини такомиллаштириш, замонавий цирк санъатини ривожлантириш, ижодий жамоалар фаолиятини қўллаб-қувватлаш ҳамда соҳанинг моддий-техник базасини мустаҳкамлаш масалаларига эътибор қаратилди.
Шунингдек, цирк санъатини ривожлантиришда ҳамкорлик ва ҳомийлик имкониятларидан самарали фойдаланиш, янги лойиҳаларни амалга ошириш ҳамда соҳанинг халқаро алоқаларини кенгайтириш юзасидан таклифлар билдирилди.
Ўзбекистонда цирк санъати кўп йиллик анъаналарга эга бўлиб, у миллий маданиятимизнинг ўзига хос ва томошабоп йўналишларидан бири сифатида алоҳида аҳамият касб этади.
Бугунги кунда цирк санъатини замонавий талаблар асосида ривожлантириш, анъанавий саҳна маҳоратини янги ижодий ёндашувлар билан уйғунлаштириш муҳим вазифалардан бири ҳисобланади.
Цирк томошаларини мазмунан бойитиш ва янги саҳнавий ечимларни жорий этиш орқали томошабинларга янада қизиқарли ва сифатли дастурларни тақдим этиш имкониятларини кенгайтириш мақсад қилинмоқда.
Айниқса, ёш ва истеъдодли ижодкорларни цирк санъатига кенг жалб этиш, уларнинг касбий маҳоратини ошириш ва ижодий салоҳиятини рўёбга чиқаришга алоҳида эътибор қаратиш зарурлиги таъкидланди.
Замонавий цирк технологиялари, саҳна безаги, ёритиш ва мультимедиа имкониятларидан самарали фойдаланиш томошаларнинг бадиий савияси ва таъсирчанлигини янада оширишга хизмат қилади.
Шу билан бирга, миллий цирк мактабининг бой тажрибасини асраб-авайлаш ва уни келгуси авлодларга етказиш соҳа олдида турган муҳим вазифалардан бири сифатида қайд этилди.
Цирк санъатида миллий образлар, анъаналар ва замонавий саҳна ечимларини уйғунлаштириш орқали ўзига хос ижодий маҳсулотлар яратиш имкониятлари ҳам муҳокама қилинди.
Ўзбекистон цирк санъатининг халқаро майдондаги нуфузини ошириш, хорижий цирк жамоалари ва ижодий ташкилотлар билан ҳамкорликни кенгайтириш янги истиқболларни очиши қайд этилди.
Халқаро фестиваллар, ижодий лойиҳалар ва гастроль дастурларида иштирок этиш ўзбек цирк санъати намуналарини кенг тарғиб қилиш ҳамда хорижий тажрибани ўрганиш учун муҳим имконият яратади. Шунингдек, цирк санъатини маданий туризм йўналиши билан уйғунлаштириш, маҳаллий ва хорижий сайёҳлар учун қизиқарли томоша дастурларини шакллантириш ҳам соҳа ривожига ижобий таъсир кўрсатиши таъкидланди.
Цирк санъатининг янада оммалашуви нафақат ижодкорлар учун янги имкониятлар яратади, балки аҳолининг маданий ҳордиқ чиқариши ва бўш вақтини мазмунли ташкил этишга ҳам хизмат қилади.
Соҳада хусусий сектор, тадбиркорлар ва ҳомийлар билан ҳамкорликни кучайтириш эса янги ижодий лойиҳаларни молиялаштириш, моддий-техник базани янгилаш ва замонавий инфратузилмани шакллантириш имконини беради. Шу мақсадда цирк санъатига қизиқувчи ёшларни аниқлаш, уларни махсус тўгарак ва таълим дастурларига жалб этиш ҳамда келажакда профессионал цирк артистларини тайёрлаш тизимини янада такомиллаштириш муҳим аҳамиятга эга.
Учрашув якунида Цирк санъати ижодий бирлашмаси фаолияти самарадорлигини ошириш, истиқболли лойиҳаларни қўллаб-қувватлаш ва белгиланган вазифаларни изчил амалга ошириш бўйича тегишли вазифалар белгилаб олинди.
Келгусида амалга ошириладиган чора-тадбирлар миллий цирк санъатини янги босқичга олиб чиқиш, ижодкорлар учун муносиб шароитлар яратиш ва Ўзбекистон цирк санъатининг халқаро майдондаги ўрнини янада мустаҳкамлашга хизмат қилиши кутилмоқда.
Н.Усмонова, ЎзА
