Бизнес-омбудсман ёрдамида ер майдони тадбиркорга қайтарилди
Маълумки, Ўзбекистон Республикаси Бизнес-омбудсмани тадбиркорлик субъектларининг ҳуқуқлари ва қонуний манфаатларини ҳимоя қилиш, уларнинг фаолиятига давлат органларининг ноқонуний аралашувига йўл қўймаслик ҳамда юзага келаётган муаммоларни бартараф этиш борасида фаол кўмак бериб келмоқда.
Хусусан, Бизнес-омбудсман аралашуви билан кўплаб тадбиркорларнинг ҳуқуқлари тикланиб, уларга етказилган зарарлар қоплаб берилмоқда.
Шунга кўра, Бизнес-омбудсманга Жиззах шаҳрида фаолият юритувчи “Э.К.” МЧЖ раҳбари амалий ёрдам сўраб мурожаат қилди.
Тадбиркорнинг маълум қилишича, жамиятга тегишли бўлган ва 2017 йилда сотиб олинган 1,4 гектар майдондаги иссиқхона биносининг кадастр ҳужжатлари электрон базага (UzKad) ўтказилиши жараёнида мулкдорнинг розилигисиз 1178 кв.м. ер майдони давлат реестридан чиқарилган.
Кейинчалик низоларни судга қадар ҳал қилиш комиссияси томонидан ушбу реестр ёзуви бекор қилинган бўлса-да, маҳаллий кадастр органи ходимлари томонидан ер ва бино-иншоотларни қайта рўйхатдан ўтказиб бериш пайсалга солиб келинган.
Мурожаат асосида Бизнес-омбудсман девони ходимлари томонидан жойига чиққан ҳолда тегишли ишчи гуруҳ тузилиб, иссиқхона биноси ва унга ёндош ҳудудлар мавжуд ҳужжатлар асосида қайта ўлчаб чиқилди. Ўрганишлар натижасида тадбиркорнинг ҳуқуқлари тикланиб, чиқариб ташланган 1178 кв.м. ер майдони билан биргаликда жамиятга тегишли бўлган тўлиқ 1,4 гектар майдондаги иссиқхона биноси UzKad тизимида қайтадан давлат рўйхатидан ўтказилиши таъминланди.
Гулноза Бобоева,
ЎзА
