Биатлон: Ўзбекистон кубоги Тошкент вилояти жамоасига насиб этди
Чирчиқ шаҳрида ёшлар ўртасида ёзги биатлон бўйича Ўзбекистон чемпионати мусобақаси ўтказилди.
Ўзбекистон Республикаси мудофаасига кўмаклашувчи “Ватанпарвар” ташкилотининг 35 йиллиги муносабати билан ташкил этилган ушбу мусобақада республикамиз ҳудудларидан келган 100 нафарга яқин спортчи уч йўналишда совринли ўринларга даъвогарлик қилди.
Мусобақада спортчилардан турли масофаларда белгиланган жойга югуриш ҳамда роллерда ҳаракатланган ҳолда келишлари ва пневматик милтиқдан нишонни мўлжалга олишлари талаб этилди.
Қизғин ва муросасиз кечган мусобақада Тошкент вилояти жамоаси Ўзбекистон кубогини қўлга киритди. Иккинчи ўрин Наманган ва учинчи ўрин Бухоро вилояти жамоасига насиб этди.
Ғолиб ва совриндорлар диплом, медаль ва қимматбаҳо совғалар билан тақдирланди.
Т.Рўзиев,
ЎзА
