Бахмаллик ўқувчиларга муносиб байрам туҳфаси
Мустақиллик айёми арафасида амалга оширилаётган ҳар бир бунёдкорлик ишида халқимизнинг эртанги кунга ишончи, фарзандлар камолига бўлган юксак эътибор мужассам. Жиззах вилоятининг Бахмал туманида янги ўқув йили арафасида фойдаланишга топширилган икки таълим маскани ҳам ана шу эзгу мақсаднинг амалий ифодаси бўлди.
Ўзбекистон Республикаси Давлат мустақиллигининг 35 йиллиги муносабати билан тумандаги 90-сонли умумтаълим мактабининг янги биноси барпо этилиб, ўқувчилар ихтиёрига топширилган бўлса, 30-сонли умумтаълим мактаби эса реконструкция қилиниб, замонавий қиёфада янги ўқув йилини қарши олишга тайёр ҳолга келтирилди.
Икки манзилдаги бу янгиликнинг мазмуни бир — болаларга сифатли таълим олиши учун муносиб шароит яратиш.
90-сонли мактабнинг янги биносида ўқувчиларнинг пухта билим олиши, бўш вақтини мазмунли ўтказиши ва ҳар томонлама камол топиши учун зарур имкониятлар яратилди. Янги таълим маскани замонавий қиёфаси билан нафақат маҳалла кўркига кўрк қўшди, балки бу ерда таълим оладиган болаларнинг орзу-интилишларига ҳам янги йўл очди.
30-сонли мактабдаги реконструкция ишлари эса таълим масканини замон талаблари асосида янгилашга қаратилди. Бу ерда синфхоналар, фан кабинетлари, кутубхона ва зарур инфратузилма яхшиланиб, ўқувчилар учун қулай ва замонавий таълим муҳити шакллантирилди.
Таълим масканларининг айнан Мустақиллик байрами арафасида фойдаланишга топширилгани воқеага янада чуқур мазмун бағишлади. Зеро, истиқлол йилларида юртимизда амалга оширилаётган кенг кўламли ислоҳотларнинг энг муҳим мақсадларидан бири — ёш авлоднинг билимли, дунёқараши кенг ва юрт тақдирига дахлдор инсонлар бўлиб вояга етиши учун барча зарур шароитларни яратишдир.
Тадбирларда туман ҳокими Азиз Эргашев иштирок этиб, ўқитувчи ва мураббийлар, ўқувчилар ҳамда маҳалла аҳлини юртимизнинг қутлуғ байрами — Мустақилликнинг 35 йиллиги билан самимий муборакбод этди.
Бахмалдаги бу икки манзилда бугун янги ўқув йилининг илк қадамлари ташланади. Янги синфхоналарда болаларнинг шовқин-сурони, устозларнинг сабоқлари янграйди. Энг муҳими, бу бинолар энди билим ва тарбия, орзу ва мақсадлар сари йўл очади.
Зеро, мактаб — оддий бино эмас. У миллатнинг эртанги куни тарбияланадиган муқаддас маскан. Шу маънода, Бахмалда Мустақилликнинг 35 йиллиги арафасида фойдаланишга топширилган икки таълим маскани байрамнинг энг улуғ мазмуни — инсон қадри ва келажак авлод орзулари билан уйғунлашган муносиб туҳфага айланди.
Абдужалол Қаюмов, ЎзА мухбири
