АҚШ Африканың үш елінен келушілерге кіруге уақытша тыйым салды
АҚШ билігі кейінгі 21 күн ішінде Африка құрлығындағы Конго, Уганда немесе Оңтүстік Суданға барған шетел азаматтарының ел аумағына кіруіне уақытша тыйым салды.
АҚШ Ауруларды бақылау және алдын алу орталығы мәліметіне сәйкес (CDC), бұл шұғыл шешім аталған өңірлерде Эбола вирусының (Бундибуджио штамы) қауіпті өршуіне байланысты қабылданған.
Шектеу 30 күн мерзімге енгізілген. Осы уақыт аяқталғаннан кейін CDC оны ұзарту немесе алып тастау жөнінде шешім қабылдайды.
АҚШ азаматтары мен грин-карта иелеріне елге кіруге рұқсат етіледі, алайда олар күшейтілген бақылаудан босатылмайды. АҚШ Ішкі қауіпсіздік департаменті шешіміне сәйкес, олар Вашингтон-Даллес халықаралық әуежайына (IAD) бағытталып, міндетті медициналық тексеру мен сауалнамадан өтуі тиіс.
Қазіргі таңда АҚШ-та Эбола вирусына қатысты күдікті немесе расталған жағдай тіркелмеген. CDC ел ішіндегі тәуекел деңгейін төмен деп бағалап отыр. Қосымша тексерулер ықтимал індеттің таралуын тежеуге бағытталған кешенді шаралардың бір бөлігі болып саналады.
