АҚШ 60 давлатга қўшимча бож жорий этмоқда

АҚШ Ҳукумати мажбурий меҳнатдан фойдаланилган маҳсулотлар импортини етарли даражада чекламаган қарийб 60 мамлакатга нисбатан 10-12,5 фоиз миқдорида қўшимча бож жорий этиш тартибини 24 июлдан эътиборан расман кучга киритди. Яъни, шундай қарор қабул қилиб бўлинган ва амалиётга жорий этилмоқда.

АҚШ Савдо вакили ушбу масала бўйича суриштирувни якунлаб, тегишли билдиришномани “Federal Register” расмий нашрида эълон қилди. Янги солиқ миқдори давлатларнинг мажбурий меҳнатга қарши кураш даражасига қараб тақсимланади.

Масалан, айни йўналишда тақиқ жорий этган ёки Вашингтон билан келишувга эришган Буюк Британия, Ҳиндистон, Канада ва Мексика учун 10 фоиз қўшимча бож қўлланади. Бошқа мамлакатлар учун эса 12,5 фоизлик миқдор белгиланган. Европа Иттифоқи давлатлари, Япония, Жанубий Корея, Тайвань ва Швейцариядан эса алоҳида тартиб асосида айрим товарларга нисбатан мавжуд тарифдан ташқари қўшимча 10-12,5 фоиз бож ундирилади.

Ф.Яхшибоева, ЎзА