Анқарада Эркин Воҳидов ва Абдулла Орипов асарларининг туркча нашри тақдим этилди
Халқаро ТУРКСОЙ ташкилоти Ўзбекистон Қаҳрамонлари Эркин Воҳидов ва Абдулла Орипов асарларини турк тилида нашр этди. Ўзбек адабиётининг буюк намояндаларини туркий дунёга кенг танитиш мақсадида Анқарада ушбу китоблар тақдимоти бўлиб ўтди.
Бу йил мамлакатимизда Ўзбекистон Қаҳрамонлари, халқ шоирлари Эркин Воҳидовнинг 90 йиллик ва Абдулла Орипов таваллудининг 85 йиллик юбилейлари кенг нишонланмоқда. Ушбу эзгу ташаббусга Халқаро туркий маданият ташкилоти ТУРКСОЙ ҳам муносиб ҳисса қўшиш ва ўзбек шеърияти ҳамда адабиётининг бу икки ёрқин намояндаси ижодини туркий дунёда кенг тарғиб қилиш мақсадида Эркин Воҳидовнинг “Сўз латофати” ва Абдулла Ориповнинг “Сайланма” китобини турк тилида тайёрлаб, нашр эттирди. Куни кеча Анқара шаҳрида жойлашган Туркия Президенти ҳузуридаги Халқ кутубхонаси мажлислар залида ҳар икки китобнинг тақдимотига бағишланган тадбир бўлиб ўтди.
- Бу китобларда ўзбек шеъриятидаги бадиият, унинг гўзаллиги, нафосати, мусиқийлиги, фалсафийлиги ва жаҳон адабиётининг манаман деган намуналари билан бўйлаша оладиган катта бир ижодий меросга эга экани ҳам мана шу китоблар орқали яққол намоён бўла олади, - дейди таниқли ўзбек шоири, Ўзбекистон Ёзувчилар уюшмаси раисининг биринчи ўринбосари Минҳожиддин Мирзо. – “Ўзбегим” қасидаси ёзилиши биланоқ у бутун дунё ўзбекларининг мадҳиясига айланиб кетган. Мустақилликка эришганимиздан сўнг Ўзбекистон мадҳиясини ёзиш устоз Абдулла Ориповга насиб этди. Туркия жамоатчилиги, зиёлилари, халқаро ТУРКСОЙ ташкилоти томонидан бу икки адиб ижодига кўрсатилаётган эътибор бу, энг аввало Ўзбекистон халқига ва миллатига, унинг бой тарихига, мустақиллиги ва бугунги кунига бўлган эҳтиромнинг яна бир намунасидир.
ТУРКСОЙ, Ўзбекистон Республикаси Маданият вазирлиги, Ўзбекистон Республикасининг Туркиядаги элчихонаси, Ўзбекистон Ёзувчилар уюшмаси ва Туркия Президенти ҳузуридаги Халқ кутубхонаси ҳамкорлигида ташкил этилган анжуманда дипломатик корпус ва халқаро ташкилот вакиллари, икки шоирнинг оила аъзолари, Туркияда Эркин Воҳидов ва Абдулла Орипов ижодини ўрганиш билан шуғулланаётган таниқли олимлар, тадқиқотчилар ва кенг жамоатчилик вакиллари иштирок этди. Анжуман иштирокчилари дастлаб кутубхона фойесида ташкил этилган Эркин Воҳидов ва Абдулла Орипов ижоди ва фаолиятига бағишланган фотокўргазма билан танишди.
Асосий тадбирда сўзга чиққанлар сўнгги йилларда Ўзбекистонда Президент Шавкат Мирзиёев ташаббуси билан адабиёт ва китобхонликка жуда катта эътибор қаратилаётганини эътироф этди. Шунингдек, ТУРКСОЙ ташкилоти туркий дунёнинг бой маданий меросини асраб-авайлаш, унинг адабий хазинасини кенг тарғиб қилиш, қардош халқлар ўртасидаги дўстлик ришталарини мустаҳкамлашга алоҳида аҳамият бераётганини, ўзбек адабиётининг икки серқирра ижодкорларининг китоблари турк тилида нашр қилингани ҳам бунга яққол мисол бўла олишини билдирди.
Шу куни Ўзбекистондан ташриф буюрган санъаткорлар томонидан Эркин Воҳидов ва Абдулла Орипов шеърларига басталанган қўшиқлардан иборат концерт дастури намойиш этилди.
Санжар Тошпўлатов,
ЎзА
