AKIpress: Саида Мирзиёева Парижда болалар ҳуқуқларини ҳимоя қилиш бўйича Ўзбекистон ташаббусларини илгари сурди
Қирғизистоннинг AKIpress ахборот агентлиги Ўзбекистон Республикаси Президенти Администрацияси раҳбари Саида Мирзиёеванинг Францияга амалий ташрифи, хусусан, Франция Президенти Эммануэль Макрон билан учрашуви ҳамда Париж тинчлик форумидаги иштирокини кенг ёритди.
Нашрнинг хабар беришича, Франция Президенти билан мулоқотда Саида Мирзиёева Ўзбекистон Президенти Шавкат Мирзиёевнинг саломини етказган. Томонлар стратегик шерикликни кенгайтириш, сунъий интеллект соҳасидаги ҳамкорлик, шунингдек, йирик иқтисодий ва гуманитар лойиҳаларни амалга ошириш масалаларини муҳокама қилган.
Агентлик мақоласида Франциянинг илғор технологиялари ва инвестицияларини жалб этиш Ўзбекистоннинг рақамли трансформациясини жадаллаштириш билан бирга, бутун Марказий Осиёнинг транзит салоҳияти ва инвестициявий жозибадорлигини оширишга хизмат қилиши қайд этилган.
Шунингдек, нашр Саида Мирзиёеванинг Париж тинчлик форумида болаларни ҳимоя қилиш масаласига алоҳида тўхталганига эътибор қаратган. Хусусан, Самарқанд декларациясининг асосий қоидаларини БМТ Бош Ассамблеяси резолюцияси сифатида қабул қилиш режаси маълум қилинган.
“Тинчлик, аслида, ҳар бир бола қаерда ва қандай оилада туғилганидан қатъи назар, хотиржам таълим олиши, хавфсиз улғайиши ва ўз келажагига ишониши демакдир”, дея Саида Мирзиёеванинг сўзларидан иқтибос келтирган агентлик.
AKIpress ушбу ташаббуслар болаларнинг хавфсиз келажагини таъминлаш, халқаро ҳамкорликни мустаҳкамлаш ва Марказий Осиёнинг барқарор ривожланишига муҳим ҳисса қўшишини таъкидлаган.
Д.ҲАКИМОВ,
ЎзА
