Олий Мажлис Сенатига Германия халқаро ҳамкорлик жамияти (GIZ)нинг “Марказий Осиёда зўравонлик экстремизмининг олдини олиш” лойиҳаси раҳбари Штефан Бухмаер ташриф буюрди.
Сенатнинг Ёшлар, хотин-қизлар, маданият ва спорт масалалари қўмитаси раиси О.Қозихонова билан учрашув давомида GIZ томонидан амалга оширилаётган лойиҳа доирасида ёшлар билан ишлаш бўйича давлат дастурларини амалга оширишга кўмаклашиш, зўравонликка асосланган экстремизмнинголдини олишда хотин-қизларнинг иштирокини кенгайтириш ҳамда идоралараро ҳамкорликни мустаҳкамлаш масалалари муҳокама қилинди.
Ш.Бухмаер бугунги кунда Ички ишлар вазирлиги, Бош прокуратура, Ҳуқуқни муҳофаза қилиш академияси, Оила ва хотин-қизлар қўмитаси каби қатор ташкилотлар билан яқин ҳамкорлик йўлга қўйилганини таъкидлади. Мазкур лойиҳа давлат ва фуқаролик жамиятининг зўравонликка асосланган экстремизмнинг олдини олиш бўйича саъй-ҳаракатларини қўллаб-қувватлашга, айниқса, заиф гуруҳларнинг радикаллашувга қарши бардошлилигини оширишга қаратилган.
Учрашув якунида томонлар ҳамкорликни мустаҳкамлаш ва келгусидаги ҳамкорлик йўналишларини янада ривожлантириш бўйича келишувга эришди.
Н.Абдураимова,
ЎзА