Зеленский: Украина бу ҳуқуқни қон билан қўлга киритди
Брюсселда бўлиб ўтган ЕИ саммитида Президент Владимир Зеленский мамлакатининг тузилмага қўшилиш жараёнини тезлаштириш вақти келганига эътибор қаратди. Унинг фикрича, Украина эркинлик, мустақиллик ва Европа билан интеграция йўлида бошқа ҳар қандай давлатдан кўра оғирроқ синовни бошдан кечирди. Шу боис Киевнинг аъзолик масаласи ортиқча кечиктирилмаслиги лозим. Зеленский Европа раҳбарларини музокаранинг барча босқичларини тезроқ очишга чақирди.
Давлат раҳбари Киев тўплаган ҳарбий тажрибани ҳам муҳим устунлик сифатида кўрсатди. Яъни, “Украина армияси бугунги кунда Европадаги энг кучли” қуролли кучлардан биридир. Бир неча йиллик уруш кўникмаси бутун қитъа хавфсизлиги учун аҳамиятли. Шу боис Украина Европа мудофаа тизимининг ажралмас қисмига айланиши мумкин.
Саммит доирасида Зеленский Европа давлатлари билан ҳамкорликда узоқ масофага учиб, махсус йўл бўйлаб ҳаракатланадиган юқори аниқликдаги қурол тури – баллистик ракета дастурини ривожлантириш ташаббусини ҳам илгари сурди. Мазкур лойиҳа қитъа хавфсизлигини мустаҳкамлашга хизмат қилишини қайд этди. У айни йўналишда турли қийинчиликка қарамай иш давом этишини таъкидлади.
Зеленский нутқида Россияга ҳам алоҳида тўхталиб, Владимир Путиннинг мақсади урушни тўхтатиш эмас, аксинча босимни давом эттириш эканига урғу берди. Европа давлатлари ҳолатни яхши англаб турганини таъкидлаб, Киев музокарага тайёрлигича қолаётганини билдирди. Шу билан бирга Украина тақдири нафақат мамлакат, балки бутун Европанинг келажак хавфсизлиги билан боғлиқлигини эслатди.
Мусулмон Зиё, ЎзА
