Зеленский: Қишдан чиқиш учун бизга ракета керак
Украина Президенти Владимир Зеленский мамлакат ҳаво мудофаасини кучайтириш учун АҚШдаги “Patriot” ракеталари захирасининг 5 фоизини сўрамоқда. Унинг айтишича, айнан шу миқдор мамлакатга қишни ўтказиб, аҳоли ҳаётини ҳимоя қилиш учун етарли. Ҳозир Киев Пентагондан эҳтиёжи учун зарур ракетанинг атиги 1 фоизини олмоқда.
Етакчи таъкидлашича, Россия Украина шаҳарларига ҳужумни кучайтирган. Киевга тахминан ҳафтасига бир марта оммавий ракета зарбаси берилаётгани, бу ҳужумларда аҳоли ҳалок бўлиб, уйлар вайрон бўлаётгани айтилди. Ой бошидаги бир ҳужумда шаҳарга учирилган 28 баллистик ракетанинг бирортаси ҳам Украина ҳаво мудофааси томонидан уриб туширилмаган.
Украина раҳбари мамлакатдаги ракета-зенит снаряди захираси 2025 йилга нисбатан 2,5 баробар камайганини билдирди. Айни пайт РФ ҳар ой аввалгидан икки баробар кўп баллистик ракета ишлатмоқда. Бундай қурилмаларни уриб тушириш қийин, чунки бундай аслаҳа юқори тезликда ва тик йўналишда ҳаракатланади.
Зеленскийнинг сўзларига кўра, АҚШ захирасининг 5 фоизини олиш қишни ўтказишга ёрдам беради, 10 фоизи эса Россиянинг баллистик ракеталарини йўқ қилиш имконини оширади. У Вашингтон билан бу масалада очиқ айтилмайдиган дипломатик мулоқот олиб борилаётганини билдирди. Манбага кўра, РФ ўтган ой Украинага 450 дан ортиқ ракета учирган, қарийб 200 қурилма баллистик траекторияда учган.
Мусулмон Зиё, ЎзА
