Зеленский: АҚШ Эрон сабаб Киевга босимни кучайтирмоқда (+видео)
Украина президенти Владимир Зеленскийнинг айтишича, Яқин Шарқдаги вазият Дональд Трамп қарорларига таъсир қилмоқда. Унинг фикрича, бу омил Трампнинг кейинги қадамларига ҳам таъсир қилади.
Зеленский Reuters агентлигига берган интервьюсида АҚШ Украинадан Донбассдан қўшинларни тўлиқ чиқаришни талаб қилаётганини айтди.
Унинг сўзларига кўра, Россияга катта ҳудудларни бериш шарти билан АҚШ Украинага хавфсизлик кафолатларини беришни ваъда қилган. Яъни Вашингтон Донбасснинг тўлиқ Россияга топширилишини талаб қилмоқда. Зеленскийнинг таъкидлашича, Украина ўз қўшинларини Донбассдан олиб чиқишга рози бўлса, АҚШ юқори даражада хавфсизлик кафолатларини беришга тайёр.
Шу билан бирга, Зеленский Трамп урушни тезроқ тугатишга интилаётганини, бироқ Эрон атрофидаги вазият бунга таъсир қилаётганини айтган. Унинг фикрича, Трамп ҳозирча Киевга босимни кучайтириш стратегиясини танлаган.
Зеленскийнинг огоҳлантиришича, агар Украина армияси Донбассдан тўлиқ чиқиб кетса, бу нафақат Киев, балки бутун Европа хавфсизлигига таҳдид бўлади. Чунки бу ҳудудда кучли мудофаа позициялари мавжуд бўлиб, улар Россия назоратига ўтиб кетиши мумкин.
У яна шуни таъкидладики, Украина ва АҚШ ўртасида хавфсизлик кафолатлари бўйича ҳужжат январь ойида тўлиқ тайёр бўлган. Аммо 24 март куни Майамида ўтган музокаралардан сўнг, бу келишув ҳужжати устида яна ишлаш кераклиги маълум бўлди.
Зеленскийнинг сўзларига кўра, АҚШ томонлардан урушни ёзгача тугатишни талаб қилмоқда. Нима учун Трамп бундай талаб қўйган? Зеленский бунинг сабаби сифатида АҚШдаги ички сиёсий жараёнларни кўрсатди. Яъни, ёз ойларида АҚШда сайлов кампанияси бошланиши кутилмоқда ва Америка раҳбариятининг асосий эътибори ички масалаларга қаратилиши мумкин.
Шу билан бирга, Зеленский агарда музокаралар муваффақиятсиз тугаса, АҚШ музокаралар жараёнидан чиқиб кетмаслигига умид билдирди.
<iframe width="560" height="315" src="https://www.youtube.com/embed/0He4zZswPHc?si=OcrGyTaYsI2EuhoK" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
