Кураш бўйича Тошкентда ташкил этилган I халқаро семинар якунланди

   Бугун пойтахтимизда илк бор дунёнинг турли давлатларида фаолият олиб бораётган мураббийлар учун ташкил этилган халқаро мураббийлик семинари якунланди. Кураш халкаро ассоциациясининг Б лицензияси учун ташкил этилган мазкур тадбирлардан кўзланган асосий максад Кураш спортини кенг ўрганиш, етакчи мутахассислар малакасини оширишдан иборат. 

  Семинар давомида кураш усуллари 8 та йўналишга бўлиб IKA нинг тажрибали инструктлари томонидан бир ҳафта давомида мукаммал ўргатилди. Семинар якуни буйича мураббийлар Б лицензия учун имтиҳон топширдилар. Мазкур лицензия IKA нинг энг кучли мураббийлари базасида сақланади ва 3 йил муддатгача амал килади. Лицензияни қўлга киритган мураббий IKA таркибидаги барча миллий федерацияларда кураш мураббийси сифатида фаолият юритиши мумкин. 

   Ҳиндистонлик тренер Вера Сарасватининг таъкидлашича, бугунги кунда Ҳиндистонда кураш спорт тури барча мактабларда жисмоний тарбия дарси дастурларига киритилган. Ҳинд диёрида 2 млн. дан ортиқ мактаб бор. Ҳар бирида биттадан курашчи мураббий бўлган тақдирда 2 млн. курашчи мураббий бор дегани. Ҳар бири ўнтадан шогирд тайёрлаганда ҳам 20 млн. дан ортиқ курашчи етишиб чиқишини англатади.

 Бу, албатта, жуда юксак кўрсаткич. Биз бошқа мамлакат экспертларининг фикрларига ҳам қизиқдик.

<iframe width="1080" height="640" src="https://www.youtube.com/embed/MVOjMaFXX_g" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Антонио МБЕРА, Конго Кураш федерацияси мураббийи:

• Ўзбек халқи руҳияти жуда самимий ва меҳмондўст. Бу йил кураш спортининг ватанига учинчи марта келишим. Аммо ҳар гал биринчи марта келгандай ҳис қиламан ўзимни. Ушбу спорт тури билан шуғуллана бошлаганимга беш йил бўлди. 2019 йил Сурхондарёда ўтказилган Ал Ҳаким ат-Термизий халқаро турнирида Президент совринини қўлга киритганман. Бугунги кунда Африкада 2 мингдан зиёд курашчилар бор. Айни кунларда замонавий кураш бўйича Африка чемпионати ўтказилиши режалаштирилмоқда. “Ёнбош”, “белбоғ”, “ҳалол” каби атамаларни, бир қанча кураш қоидаларини ўзбек тилида ўрганиш барибир ўзига яраша масъулиятли эканини ҳис қилдим. Шу кунгача кураш атамалари Конгода инглиз тилида ўргатилар эди. Энди юртимга қайтгач бу қоидаларни ёш спортчиларга ўзбек атамалари билан ўргатаман.

Каи Фенг Чанг, Хитой-Тайпеи Кураш федерацияси бош котиби:

• Спор т– бу илм, спорт – бу санъат. Биз ўз юртимизда ўзбек тили ва маданиятини кураш орқали ёямиз. Сабаби Тайпеига кураш спорт тури кириб келгунига қадар ўзбек халқи ҳақида жуда кам одам билар эди. Кураш кириб келгач, ўзига хос беллашув қоидаларига, айниқса, Ўзбекистон байроғи рангида тикилган яктакка қизиқиш ортиб борди. Юртингизга иккинчи марта келишим. Кураш федерацияси мен учун ўз уйимдай қадрли бўлиб қолган. Ҳар гал келганимда ўзбекча сўзлар, анъаналар ўрганиб кетаман. Бу гал ҳам кўплаб халқаро тажрибага эга бўлиш билан бирга халқингиз билан янада яқиндан дўстлашиб қайтмоқдамиз.

Юлдуз Ўрмонова, 

Нозимжон Мардонов (видео), ЎзА