Қирғизистон пойтахти Бишкек шаҳрида спорт курашлари бўйича U20 ёш тоифасида давом этаётган Осиё чемпионатининг юнон-рум кураши мусобақалари якунланди.

Қитъанинг энг кучли миллий терма жамоалари иштирокида ўтган баҳсларда мамлакатимизнинг ёш юнон-рум кураши усталари муносиб натижага эришди.

Чемпионатнинг бир кун олдинги беллашувларида терма жамоамиз аъзолари Амирхон Бердиқулов -130 килограмм оғирликда кумуш, Бобур Абдурасулов -87 килограммда бронза медалини қўлга киритган эди.

Кеча ўтган мусобақалар давомида маҳоратли курашчиларимиздан Аҳмад Қодиров -72 килограммда олтин, Фаёзбек Эшмирзаев -67 килограммда,  Азимжон Соатуллаев -82 килограммлилар ўртасидаги беллашувларда кумуш,  Хуршидбек Нормуҳаммедов -60 килограммда бронза медалига эга чиқди.

1 та олтин, 3 та кумуш, 2 та бронза медалига сазовор бўлган Ўзбекистон терма жамоаси Осиё чемпионатида умумжамоа ҳисобида 3-ўринни эгаллади.

4 та олтин медални қўлга киритган Эрон терма жамоаси биринчи, 2 та олтин медаль соҳиби бўлган Қирғизистон вакиллари 2-ўриндан жой олди.

Т.Рўзиев,

ЎзА