Марказий ва Ғарбий Осиёнинг энг кучли ёш теннисчилари иштирокида Қозоғистоннинг Олмаота шаҳрида теннис бўйича U-16 ёш тоифасида ўтказилаётган “Roland Garros Junior Series by Renault” мусобақасида иштирок этаётган ўзбекистонлик Алан Зинатулин ва Акмал Абдуллаев яккалик баҳсларда ярим финал йўлланмасини қўлга киритди.

Саралаш мусобақаларида муваффақиятли қатнашган ёш теннисчимиз Алан Зинатулин чорак финалда Родион Трайгелни (Қозоғистон) 6:3, 6:3 ҳисобида мағлуб этди. У кейинги босқичда яна бир қозоғичстонлик ракетка устаси Мансур Саинов билан рўбарў келади.  

Акмал Абдуллаев чорак финалда ҳамюртимиз Маҳмудбек Бекназаровни 3:6, 6:2, 6:0 кўринишида доғда қолдирди. У финал йўлланмаси учун энди Ансар Ниеткалиев (Қозоғистон) қаршилигини енгиши лозим бўлади.  

Турнирнинг аёллар ўртасидаги баҳсларида қатнашаётган ҳамюртимиз Кейра Ким чорак финалга қадар етиб бориб, қозоғистонлик Адия Омарбекка 2:6, 4:6 ҳисобида имкониятни бой бериб қўйди.  

Айтиш лозим, мазкур турнир ғолиблари жорий йилнинг октябрь ойида Японияда ўтадиган “Roland Garros Junior Series” финал босқичида қатнашиш ҳуқуқига эга бўлади. Кунчиқар юрт мусобақасида ғолибликликка эришган теннисчилар Парижда ташкил этиладиган “Roland Garros Junior Series-2026” мусобақасида кортга чиқади. 

Олмаотада давом этаётган “Roland Garros Junior Series by Renault”нинг финал ўйинлари 9 август куни бўлиб ўтади.  

Т.Рўзиев, ЎзА