Ёш дзюдочиларимиз Озарбайжонда ғолибликка эришди
Боку шаҳрида ўсмирлар ўртасида дзюдо бўйича ўтказилган "Alibayli Cup” халқаро турнирида 2 нафар ёш спортчимизнинг олтин медални қўлга киритгани шарафига Ўзбекистон байроғи кўтарилиб, мадҳимиз баралла янгради.
Нуфузли турнир давомида юртимиз дзюдочи ёшлари Озарбайжон, Россия, Қозоғистон, Тожикистон, Туркия, Грузия сингари ўнга яқин давлат вакиллари билан муросасиз беллашувларда рўбарў келди. Ватанимиз шарафини муносиб ҳимоя қилган Ўлмас Гуллиев мураббийлигидаги ёш дзюдочиларимиздан Самиюсуф Аббосов ва Шоҳжаҳон Усмонов ўз вазн тоифаларида олтин медалларга сазовор бўлди.
Яна бошқа иқтидорли ўсмирларимиз совриндорлар қаторидан ўрин эгаллади.
Т.Рўзиев, ЎзА