“Лицензиялаш, рухсат бериш ва хабардор қилиш тартиб-таомиллари янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун қабул қилинди.

Қонун билан “Лицензиялаш, рухсат бериш ва хабардор қилиш тартиб-таомиллари тўғрисида”, “Давлат божи тўғрисида”, “Ёнғин хавфсизлиги тўғрисида”, “Экспорт назорати тўғрисида” ва “Туризм тўғрисида”ги қонунларга, шунингдек, Маъмурий жавобгарлик тўғрисидаги ҳамда Божхона кодексларига лицензиялаш, рухсат бериш ва хабардор қилиш тартиб-таомилларини такомиллаштиришга қаратилган ўзгартириш ва қўшимчалар киритилди. 

Қонун билан киритилган ўзгартиришларга кўра, ёнғин хавфсизлиги билан боғлиқ ушбу фаолият турлари лицензияланадиган фаолият турлари рўйхатига киритилди.

Ёнғинни автоматик тарзда ўчириш ускуналарини монтаж қилиш, созлаш, таъмирлаш ҳамда уларга техник хизмат кўрсатиш фаолияти, ёнғин сигнализацияси қурилмаларини монтаж қилиш, созлаш, таъмирлаш ҳамда уларга техник хизмат кўрсатиш фаолияти ҳам шулар жумласидан. 

Илгари ёнғин хавфсизлиги соҳасидаги фаолият турлари хабардор қилиш тартибида амалга оширилган.

Шунингдек, киритилган қўшимчаларга кўра, Ўзбекистон норезиденти бўлган чет эл юридик шахслари томонидан Ўзбекистонда лицензия ва рухсат этиш хусусиятига эга хужжатларни олиш учун ариза бериш ҳамда хабардор қилиш уларнинг Ўзбекистондаги ҳисобга қўйилган доимий муассасаси орқали амалга оширилади. 

Бунда ташқи иқтисодий фаолият ҳамда транзит юкларни ташиш билан боғлик 1 марталик ҳаракатларни бажариш учун рухсат этиш хусусиятига эга ҳужжатларни расмийлаштириш учун ушбу шахсларнинг Ўзбекистонда доимий муассасаларини ҳисобга қўйиши талаб этилмайди.

Қонун расмий эълон қилинган кундан 3 ой ўтгач кучга киради.

Н.Абдураимова,

ЎзА