Япония АҚШ бозорига янги гибрид машина чиқаради
“Nissan Americas” раҳбари Кристиан Менье маълум қилишича, Япония автогиганти ноябрь ойида АҚШ бозорида “Rogue e-Power” гибрид кроссоверини сотувга чиқаради. Компания шу тоифадаги автомобиллар савдосини қисқа вақт ичида умумий миқдорнинг 30-40 фоизига етказишни режалаштирган.
Мазкур технология дунё бўйлаб 2 миллиондан кўп машинада қўлланган бўлса-да, Америка бозори учун илк бор таклиф этилмоқда. Бундан ташқари компания “Kicks e-Power” моделини ҳам шимолий америкаликларга етказиб бериш ҳамда келажакда йирик “йўл танламас” ва “пикап”га ҳам гибрид двигатель ўрнатишни мақсад қилган.
“Nissan” АҚШдаги маҳаллийлаштириш даражасини 2030 йил охиригача 80 фоизга етказишни мўлжалламоқда. “Rogue e-Power” моделини маҳаллий ишлаб чиқариш эса 2028 йилдан бошланади.
Қолаверса, корхона яқин беш йил ичида АҚШ автомобиль бозори Хитой ишлаб чиқарувчилари учун очилмаслигидан умидвор. Шунга қарамай, ишлаб чиқариш муддатини қисқартириш ва таннархни пасайтириш орқали эҳтимолий рақобатга ҳам ҳозирлик кўрмоқда.
Ф.Яхшибоева, ЎзА
