Янгиқўрғонлик ҳунарманд маҳсулотлари хорижга йўл олмоқда

ФОТОРЕПОРТАЖ

Наманган вилояти Янгиқўрғон туманида яшовчи ҳунарманд Мавлуда Сарманова 40 йилдан буён тўқувчилик билан шуғулланиб келади. Айни пайтда у тумандаги “Келажак” марказида ёшларга ҳунар сирларини ўргатмоқда.

Ҳунарманд табиий толалардан тайёрланган ранг-баранг иплардан фойдаланиб, кийим-кечак, миллий қўғирчоқлар, юмшоқ ўйинчоқлар, пойабзал, сумка ҳамда турли декоратив буюмлар каби 30 дан ортиқ турдаги маҳсулотлар тайёрлайди.

[gallery-3761]

Мавлуда Сарманованинг қўл меҳнати намуналари халқаро фестивалларда ҳам намойиш этилган. Миллий қўғирчоқларга хорижлик меҳмонларнинг қизиқиши натижасида унинг бир қатор коллекциялари Туркия, Ҳиндистон ва Қозоғистонга сотилган.

У буюртмалар асосида турли ташкилотлар учун юмшоқ ўйинчоқлар ҳам тайёрлайди. Мазкур фаолиятдан ойига 10 миллион сўмдан ортиқ даромад олмоқда.

Ҳунарманднинг навбатдаги мақсади — эртак қаҳрамонлари ва миллий қўғирчоқлар жамланган мўъжаз ўйинчоқлар дўконини ташкил этиш. Бу орқали у ўз маҳсулотларини кенг тарғиб қилиш, шунингдек, шогирдларининг ижодий ишларини намойиш этиш ва сотиш учун янги имконият яратишни режалаштирган.

Ҳотам МАМАДАЛИЕВ(сурат),ЎзА