Андижон вилояти қўғирчоқ театри жамоаси томонидан янги йил байрами кунлари болажонлар учун “Янги йил саргузаштлари” деб номланган театрлаштирилган байрам томошалари намойиш этилмоқда.

Қиш беғубор ва орзу-умидлар фаслидир. Ана шундай пок ҳис-туйғулар ҳар бир қалбни шубҳасиз, ширин ва тотли лаҳзаларга ошно этади. Ушбу фаслнинг кўркли байрами Янги йил эса болажонларга олам-олам қувонч, катталарга ёшлик сурурини бағишлайди.

Янги йил байрами кунларида вилоят болалар қўғирчоқ театрида ҳам жўшқин ва байрамона ҳаёт кечмоқда. Театр жамоаси янги йил байрамига кўтаринкилик бахш этиш, болажонларга қувонч улашиш мақсадида ўзига хос байрам туҳфасини тайёрлаган.

– Ижодий жамоамиз Янги йил байрами муносабати билан ижодкор Равшан Ҳамроз сценарийси асосида саҳналаштирилган “Янги йил саргузаштлари” байрам томошасини намойиш этмоқда, – дейди театр раҳбари Ҳилолахон Зияева. – Мақсадимиз, томошалар орқали болажонларга қувонч, байрамона кайфият, уларнинг қалбига эзгулик улашишдир.  

Янги йил байрами томошалари болажонларни сеҳрли ва мўъжизавий эртаклар оламига олиб киради. Спектаклда асосий қаҳрамонлар Қор маликаси, Гринч, Санта бобо, элфлар ва Ялмоғиз капмир тимсолида яхшилик ва эзгулик ҳамиша  ёвузлик устидан ғолиб бўлиши, ёмонлар албатта жазосини олиши, кимдир ўзгага чоҳ қазиса, алал оқибат унга ўзи тушиши қизиқарли сюжетлар орқали кўрсатиб берилади.  

Болажонларнинг юз-кўзларидаги қувонч, байрамона кайфиятни кўриб, беихтиёр уларга ҳавасингиз, қувончларига шерик бўлгингиз келади.  

–“Янги йил саргузаштлари” байрам томошаси жуда қизиқарли экан, дўстларим билан маза қилиб кўрдик, – дейди Андижон шаҳридаги 19 - умумтаълим мактаби ўқувчиси Темурбек Рустамов. – Байрам томошалари мен қатори барча тенгдошларимда унутилмас таассуротлар қолдирди.  

Андижон вилоят қўғирчоқ театри жамоасининг Янги йил байрами томошаларида турли эртаклар қаҳрамонлари орқали ростгўйлик, ҳалоллик ва ҳамиша эзгуликка интилиб яшашдек юксак инсоний фазилатлар улуғланади.  

Вилоят қўғирчоқ театрининг Янги йил байрами томошалари давом этмоқда.  

<iframe width="789" height="444" src="https://www.youtube.com/embed/vPzykGvLqrc" title="“Yangi yil sarguzashtlari” bolajonlarga quvonch ulashmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ф. Убайдуллаев,

З. Умрзоқов (сурат), ЎзА мухбирлари