Гиёҳвандлик воситалари сотувчилари кўпинча ўз хизматларини Интернет орқали таклиф қилиб, уларни турли усуллар билан тарқатмоқда.

Ўзбекистон Республикаси Президенти Администрацияси ҳузуридаги Наркотикларни назорат қилиш миллий маркази катта инспектори Сарварбек Ўрмонов шу ҳақда маълумот берди:

– Гиёҳвандлик воситаларини қонунга хилоф равишда ўтказиш ўта оғир жиноятлар тоифасига киради ва уни содир этган шахсларга нисбатан жуда қаттиқ жазо чоралари қўлланилади.

Наркотикларни тарқатишда қўлдан-қўлга бериш эмас, балки турли алоқа воситалари орқали хабарлашиш, гиёҳванд моддаларни турли жойларга ташлаб кетиш амалиётидан кенг фойдаланилмоқда.

Наркокурьерлар томонидан бу усул – “закладка” деб аталади. Улар асосан кичик ўлчамларда бўлади. Баъзан ҳар қандай металл конструкцияларга осонгина маҳкамлаш учун пакетга магнит қўшиб қўйилади.

“Закладка”лар жамоат жойларига, кўп қаватли уйларнинг ҳовлиларига, гулзорларга, болалар майдончаларига яшириб қўйилиши кўп кузатилган.  

Қиш мавсумида наркокурьерлар кўп қаватли уйларнинг кириш йўлаклари ва зинапоя майдончаларидан кўпроқ фойдаланади – дераза панжаралари, кабель қутилари, гул туваклари каби жойларга “закладка”ни яширин жойлайди.  

Уларнинг ҳаракатларидан таниб олиш мумкин: ниманидир одамлар кам юрадиган жамоат жойига яширишга уринади, сўнгра истеъмолчига юбориш учун уни суратга олади.

“Закладчик”лар кўп қаватли уйларнинг кириш йўлаги (подъезд)дан фойдаланаётганини аниқлаш мумкин. Масалан, зинапояда ниманидир қидираётган нотаниш одамлар, очилган кабель-каналлар,  ағдарилган гул туваклари, улардаги ковланган тупроқ (ва ҳоказо) улар шу ерда ҳаракатланганини билдиради. Баъзан нотаниш одамларнинг домофонга қўнғироқ қилиб, эшикни очишни сўраши ҳам бежиз бўлмайди.

Агар кимдир тасодифан “закладка”ни топиб олса ёки унинг жойлаштирилганига гувоҳ бўлса, бу ҳақда ички ишлар органи – 102 рақамига ёки “@stopnarko_bot” телеграм ботига хабар бериши керак.  

Ички ишлар органлари ходимлари келгунига қадар шубҳали шахсларнинг ташқи кўриниши, улар ҳаракатланаётган транспорт воситасининг русуми ва давлат рақамини эслаб қолиш мақсадга мувофиқ.  

Ҳеч қачон “закладка”ни қўлга олмаслик керак. Эҳтимол, модда заҳарли бўлиши, бундан ташқари, ички ишлар органи ходими “закладка”ни текшириб, жиноятчининг бармоқ изларини олиши мумкин.

Огоҳ ва сергак бўлинг ва “закладка” топилганда қандай ҳаракат қилиш кераклигини танишларингизга ва болаларга тушунтиришни унутманг!

Норгул Абдураимова, ЎзА