Янги усул билан 27 та “яширин” сайёра аниқланди
Астрономлар янги ёндашув орқали икки юлдузли тизимлар атрофида айланувчи 27 та “номзод сайёра”ни аниқлади. Euronews хабарига кўра, бу гал олимлар анъанавий транзит усулидан четга чиқиб, юлдузлар ҳаракатидаги жуда нозик ўзгаришларни таҳлил қилган.
Одатда сайёралар юлдуз олдидан ўтганда унинг ёруғлиги пасайиши орқали аниқланади. Аммо бу тадқиқотда икки юлдуз бир-бирини ёпиб ўтаётган пайтдаги жуда кичик вақт силжишлари кузатилган. Олимлар фикрича, айнан шу ўзгаришлар кўринмас сайёраларнинг гравитацион таъсиридан дарак беради.
Тадқиқотга Янги Жанубий Уэлс университети докторанти Марго Торнтон раҳбарлик қилган. Унда NASAнинг ТЕSS космик телескопи томонидан йиллар давомида тўпланган маълумотлар таҳлил қилинган.
Мазкур усул “apsidal pretsessiya” ҳодисасига асосланади — яъни икки юлдуз орбитасининг аста-секин ўзгариши. Агар тизимда сайёра мавжуд бўлса, у юлдузлар ҳаракатига сезиларли, аммо жуда нозик таъсир кўрсатади. Шу тариқа олимлар сайёраларни тўғридан-тўғри кузатмасдан туриб ҳам уларнинг мавжудлигини аниқлашга эришган.
<iframe width="560" height="315" src="https://www.youtube.com/embed/BBEr3-JoJ9k?si=FTXpEVUCghwBDSxb" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Мадинабону Насриева, Улуғбек Тўхтаев, ЎзА
