Юртимиз сўнгги йилларда қурилиш, бунёдкорлик майдонига айланди. Янги қурилган уй-жойлар, замонавий бинолар ёнидан ўта туриб, кишининг кўнглидан ажиб ҳислар ўтади.

Мамлакатимизда қурилиш-бунёдкорлик ишлари иқтисодиётимизнинг жадал суръатлар билан ривожланаётган соҳаларидан бирига айланди. Қурилиш ва уй-жой коммунал хўжалиги вазирлиги томонидан Тошкент вилояти Паркент тумани “Паркентсой” сой бўйида барпо этилаётган “Янги Ўзбекистон” массивига ташкил этилган пресс-турда ҳам бунга амин бўлдик. 

Пресс-тур давомида массив қурилишидаги ўзига хос жиҳатлар, аҳоли учун яратилаётган шароит ва уй-жойларнинг энергосамарадорлик кўрсаткичлари билан танишдик. 

Вазирлар Маҳкамасининг ўтган йил 31 октябрдаги “Тошкент вилоятининг Паркент туманини ижтимоий-иқтисодий ривожлантириш ҳамда аҳоли турмуш даражасини янада яхшилашга доир қўшимча чора-тадбирлар тўғрисида”ги қарорига асосан “Паркентсой” сой ўзанига туташ ҳудуддаги 100 гектаргача бўлган ер майдонларида кўп қаватли уй-жойлар, савдо ва маиший хизмат кўрсатиш шохобчалари ҳамда кўнгилочар боғлар барпо этиш белгиланган. 

Мазкур турар жой мажмуасини ичимлик суви билан таъминлаш учун лойиҳага асосан “Қайилма” МФЙ ҳудудида жойлашган “Гулбоғ-1” сув иншоотидан иккита нуқтада ер ости сув олиш қудуқлари барпо этилмоқда. Иншоотдан турар жой мажмуасига қадар 3,5 км узунликда Д=275 мм бўлган металл ичимлик сув тармоқлари, 1 дона насос биноси, 2 дона умумий ҳажми 500 м3 бўлган сув резервуарлари ҳамда замонавий энергия тежамкор сув узатиш насослари, электр трансформатор ўрнатиш белгиланган. 

Бугунги кунда оқова сув чиқариш хизматига улаш бўйича турар жой мажмуасидан “Қайилма” МФЙ ҳудудидан ўтувчи Д=800 мм бўлган магистрал оқова коллекторигача 4,5 км узунликда Д=500 мм бўлган оқова тармоғини тортиш ишлари олиб борилмоқда. Ҳозирда ер ости сув олиш қудуқлари қазилмоқда, сув резервуарлари ҳамда тармоқ тортиш ишлари бошланган. 

“Гулбоғ-1” сув иншооти ҳудудидан олинадиган сув миқдори “Паркентсой” турар жой мажмуасининг биринчи босқичида барпо этилаётган жами 27 та кўп қаватли уйларни, яъни 1 минг 16 та хонадонни ичимлик суви билан таъминлаш учун етарли бўлади.

– “Паркентсой” сой бўйида қурилаётган кўп қаватли уй-жойлар марказлашган иссиқлик тармоғи – қозонхона орқали иситилиши кўзда тутилган, – дейди Паркент тумани Қурилиш ва уй-жой коммунал хўжалиги бўлими бош меъмори Ҳусниддин Шаҳобиддинов. – Муҳандислик-коммуникация тармоқларини қуриш ишлари жадал суръатларда амалга ошириб келинмоқда. Ҳозирда 0,30 гектар ер майдонига марказлашган иссиқлик қозонларини ўрнатиш, сарфланадиган иссиқ сув сиғими бўйича лойиҳаларни ишлаб чиқиш жараёнлари олиб борилмоқда. Мазкур лойиҳа 2030 йилгача давом этади. Биринчи босқичи жорий йилнинг сентябрь ойида фойдаланишга топширилади. Яъни, жорий йилда 1 минг 16 та хонадондан иборат 27 та кўп қаватли уй бунёд этилмоқда. Ушбу уйларнинг 22 таси 5 қаватдан ва 5 таси 7 қаватдан иборат. Бугунги кунда мазкур уй-жойларнинг қурилиши якунланиш арафасида. “Паркентсой” сой бўйида барпо этилаётган “Янги Ўзбекистон” массивидаги кўп қаватли уй-жойларнинг бир қисми жорий йилда ўз эгаларига топширилади. 

Қурилиш индустриясининг иқтисодиёт таркибида тутган ўрни жуда юқори. Шу жиҳатдан олганда, бугунги кунда Ўзбекистонда қурилиш соҳасида олиб борилаётган ишлар, хизматлар миллий иқтисодиётни мустаҳкамловчи таянч нуқта сифатида ижтимоий йўналишдаги долзарб вазифаларга ечим топишда муҳим восита бўлаётгани билан эътиборга молик. 

Қурилиш иқтисодиётнинг барча тармоқлари моддий-техник базасини яратишда, аҳолининг шинам уй, ижтимоий ва муҳандислик инфратузилмаси хизматлари, шунингдек, маданий дам олишга бўлган эҳтиёжларини қондиришда муҳим аҳамият касб этади. 

Бугунги кунда мамлакатимиз қурилиш соҳасидаги сиёсати, бу борада амалга оширилаётган лойиҳа ва ишлар айни шу мақсадларга хизмат қилаётгани билан диққатга сазовор. 

<iframe width="640" height="420" src="https://www.youtube.com/embed/ZR2w8PZtI2Q" title="“Yangi O‘zbekiston” massividagi ko‘p qavatli uy-joylarning joriy yilda o‘z egalariga topshiriladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Шаҳноза Маматуропова, ЎзА