Нурафшон шаҳри Тўй-тепа маҳалласида яшовчи Сергей Ким ва унинг онаси ижтимоий хизмат кўрсатувчи ходим ва ҳоким ёрдамчилари томонидан “Камбағаллик реестри”га киритилди. Бу орқали уларга тизимли ёрдам кўрсатиш ишлари йўлга қўйилди.

– Сергей Ким ва онасининг шароити ўрганилгандан сўнг, улар “Камбағаллик реестри”га киритилди. Шу асосида қатор ёрдам тадбирлари амалга оширилди. Ҳудуддагиларнинг айтишича, С.Ким меҳнаткаш йигит, у ўз оиласи учун ҳаракат қилади. Шу боис у ўзини-ўзи банд қилиши ва қўшимча даромад топиши учун ҳомийлар ёрдамида мато-скутер олиб берилди. Уй-жой шароитини яхшилаш учун қурилиш материаллари етказилди. Уйидаги кўпгина қурилиш ишларини эса ўзи қилган. Шунингдек, боғдорчилик ва деҳқончилик билан шуғулланиши учун тавсиялар берилди, – дейди мазкур маҳаллада комплекс ижтимоий хизмат кўрсатувчи ходим Сойибжон Жўраев. 

– Аввало, бизга кўрсатилган ёрдам учун катта раҳмат айтмоқчиман, – дейди Сергей Ким. – Чуқурлаштирилган тиббий кўрикдан сўнг саломатлигимни яхшилаш учун зарур кўрсатмалар олдим. Шунингдек, моддий ёрдам нафақаси ва мато-скутер менга катта имконият яратди. Энди оиламга ҳам фойдам тегади. 

Ҳозирда у уйида боғдорчилик билан ҳам шуғулланмоқда. Сергей Ким 2-гуруҳ ногиронлигига эга бўлишига қарамай, ўз имкониятларидан самарали фойдаланишга ҳаракат қилмоқда. Бу каби тизимли ёрдамлар орқали Тошкент вилоятида ижтимоий ҳимояга муҳтож оилалар ҳаёти яхшиланиб, улар фаровонлик сари қадам ташлаш имконига эга бўлмоқда. 

А.Мусаев, ЎзА