Халқаро волейбол федерацияси (FIVB) жорий йилнинг 24 июль - 3 август кунлари Тошкентда 19 ёшгача бўлган ўғил болалар миллий терма жамоалари иштирокида ўтадиган жаҳон чемпионатида қатнашадиган 24 та жамоанинг кенгайтирилган рўйхатини эълон қилди.

Эътиборли жиҳати, пойтахтимиз июль-август ойлари давомида дунё волейбол ишқибозларининг эътиборини ўзига қаратиши билан бирга, жаҳон волейболининг келажак юлдузлари сифатида кўрилаётган бир қатор ёш иқтидор эгаларини Тошкентда жам этади.

Хўш, жаҳон волейболининг ёрқин истеъдодлари сифатида кўрилаётган ёшлардан кимлар Тошкент майдонларида кўриниш беради?

FIVB маълумотига кўра, яқин ўтмишда Италия терма жамоасининг моҳир волейболчиси бўлган Христо Златановнинг ўғли Мануэль Златанов Тошкент мусобақаларига шиддат бағишлаши шубҳасиз.

Айтиш лозимки, Мануэль ўтган йили U17 ёш тоифасидаги жаҳон чемпионатининг энг қиммат ўйинчиси бўлган.

Шунингдек, юртимизда ташкил этиладиган жаҳон чемпионатида Италия, Франция терма жамоалари таркибида ҳам бир қатор номдор ёшлар борки, улар ҳам чемпионатда ўз сўзини айтишга интилиши тайин.

Шунингдек, чемпионатда дунёнинг бир қатор ёш истеъдод эгалари қатнашиши кутилмоқда.

Т.Рўзиев, ЎзА