Пойтахтимиздаги “Олимпия шаҳарчаси” кундан-кунга кўплаб турнирлар, чемпионатлар, ўқув-машғулот йиғинлари марказига айланиб бормоқда.

Куни кеча мазкур замонавий спорт шаҳарчасининг волейбол майдонида аёллар жамоалари ўртасида Марказий Осиё волейбол ассоциацияси (CAVA) томонидан ташкил этилган чемпионат минтақа спортчилари, мутахассис ва мураббийлар, ҳакамлар, техник тизим вакилларига катта завқу-шавқни тортиқ этди.

Зарур инфратузилмалар билан таъминланган мажмуа, халқаро талабларга жавоб берадиган майдон, барча қулайликларга эга шинам техник хоналар Марказий Осиё чемпионатининг профессионал ўтишини таъминлади.

Мусобақалар якунида фаол иштирок этган жамоалар, энг яхши ўйинчилар ҳамда ҳакамлар махсус сертификат ва совринлар билан тақдирланди.

Тақдирлаш маросимида чемпионатда 1-ўринни эгаллаган Эрон, 2-ўрин соҳиби Ўзбекистон ва 3-ўринни қўлга киритган Қирғизистон терма жамоаси аъзоларига диплом, медаль ва эсдалик совғалари тақдим этилди.

Т.Рўзиев,

ЎзА