Венесуэла АҚШнинг Рауль Кастрога оид қарорини кескин қоралади
Венесуэланинг ҳукмрон Социалистик партияси (PSUV) АҚШ томонидан Кубанинг собиқ президенти Рауль Кастрога нисбатан ҳибсга олиш ордери чиқарилганини кескин қоралади. Бу ҳақда “Анадолу” ахборот агентлиги хабар бермоқда.
Партия ўз баёнотида ушбу қарор ҳеч қандай ҳуқуқий асосга эга эмаслигини таъкидлаб, Гавана ҳукумати ва халқи билан ҳамжиҳат эканини билдирди. “PSUV” вакилларининг қайд этишича, Вашингтоннинг бу қарори халқаро ҳуқуқ нормалари ҳамда Кубанинг суверенитетини қўпол равишда бузиш ҳисобланади.
Бундан ташқари, мазкур қадам Қўшма Штатларнинг ушбу ўлкага ўтказиб келаётган кўп йиллик сиёсий босимининг навбатдаги босқичи сифатида баҳоланди. Шу муносабат билан, партия Лотин Америкаси ва Кариб ҳавзаси мамлакатларини Кубани фаол қўллаб-қувватлашга чақирди.
Баёнотда шунингдек, АҚШ томонидан Кубага қарши иқтисодий қамалнинг кучайтирилгани маҳаллий аҳоли турмуш даражасига оғир зарба бўлаётгани алоҳида айтиб ўтилди.
Маълумот учун: АҚШ Флорида штати прокуратураси Рауль Кастрога нисбатан 1996 йил 24 февралда халқаро ҳаво ҳудудида “Қутқарувчи биродарлар” ташкилотининг иккита фуқаролик самолётини уриб туширгани билан боғлиқ айблов асосида ҳибсга олиш ордерини эълон қилган эди.
Ф.Яхшибоева, ЎзА
