Бу ҳақда “Ўзбекнефтгаз” акциядорлик жамияти ахборот хизмати маълум қилди.

Унда таъкидланишича,Европа кимё агентлиги (ECHA) томонидан берилган мазкур сертификат “Uzbekistan GTL” заводида ишлаб чиқарилаётган дизель ёқилғисини Европа бозорларига эркин ва кенг кўламда экспорт қилиш имконини яратади.

Шунингдек, “GSP+” тизими доирасида маҳсулот экспорт ҳажмини бир неча баробарга ошириш учун янги имкониятлар эшигини очади. 

Заводда ишлаб чиқарилаётган юқори сифатли, экологик тоза ва хавфсиз синтетик нефть маҳсулотлари: дизель ёқилғиси, авиакеросин, нафта ва бошқалар Эстония, Руминия, Нидерландия, Россия, АҚШ, Грузия, Бирлашган Араб Амирликлари, Қирғизистон ва Тожикистон каби давлатларга экспорт қилиняпти.

Айтиш жоиз, ушбу сертификат нафақат маҳаллий ишлаб чиқариш салоҳиятини халқаро бозорда намоён этишга, балки Ўзбекистоннинг экспорт салоҳиятини ошириш ва ташқи иқтисодий алоқаларни янада кенгайтиришга хизмат қилувчи муҳим қадамдир.

Н.Зиёдуллаева тайёрлади,

ЎзА