Куни кеча Озарбайжоннинг бош расмий ахборот агентлиги – АзерТАЖ сайтида Ўзбекистон Миллий ахборот агентлиги (ЎзА) мухбири Абдуазиз Хидировнинг “Янги Ўзбекистон – дунё ҳамжамиятида очиқ ва прагматик ташқи сиёсатнинг муҳим ташаббускори” номли таҳлилий мақола эълон қилинди.

Таъкидлаш жоиз, мамлакатимизда кечаётган улкан ижобий ўзгаришлар қисман акс эттирилган ушбу ахборий манбага билдирилган халқаро муносабат ўзига хос медиа-сигнал сифатида Ўзбекистон билан боғлиқ ижтимоий-сиёсий таҳлилга нисбатан кучли эҳтиёждан далолат. Энг муҳими, бундай талаб нафақат Озарбайжон, балки бутун Жанубий Кавказ миқёсида намоён бўлиши мавжуд қамровни янада кенгайтиради.

АзерТАЖ эътирофича, муаллиф Тошкент ташқи сиёсий йўналишининг уч устуни – очиқлик, прагматизм ва кўп векторлиликка диққат қаратиб, БМТ махсус резолюциялари, Самарқанднинг йирик халқаро форумлар учун барқарор майдон сифатидаги ўрни, транспорт йўлакларини кенгайтириш ва “яшил” энергетикани ривожлантириш лойиҳалари илгари сурилиши мисолида, айни ёндашувнинг амалий натижаларини таҳлил қилган. Ўзбек дипломатиясини қитъалар ва маданиятлар ўртасидаги ишончли кўприк сифатида тақдим этган.

“Марказий Осиё – Европа Иттифоқи” саммити, БМТ доирасидаги фаол ташаббускорлик, инфратузилма ва энергетика соҳасидаги йирик лойиҳалар мавзуга қўшимча ижобий мазмун юклаган.

Хулоса аниқ: ташқи сиёсат қиймати натижа билан ўлчанади – қарор ҳаётга кўчиши, амалиёт эса ўзаро манфаатли ҳамкорликка хизмат қилиши лозим. Мақола шу мантиқни ишончли далиллар, аниқ мисоллар ва тизимли таҳлил орқали очиб берган.

ЎзА