Уй-жой қурилиши учун ерлар камайиши бозорга қандай таъсир қилади?
2026 йилнинг биринчи чорагида Ўзбекистонда уй-жой қурилиши учун аукцион орқали сотилган ер майдонлари сезиларли даражада камайган. Бу ҳақда Макроиқтисодий ва ҳудудий тадқиқотлар институти матбуот хизмати маълум қилди.
Таҳлилларга кўра, якка тартибдаги уй-жой қурилиши учун сотилган ерлар 49,9 гектардан 27,6 гектаргача қисқарган. Кўп қаватли уй-жойлар учун ажратилган ер майдонлари эса 48,3 гектардан 14,1 гектаргача тушган. Шу билан бирга, “Янги Ўзбекистон” массивларида кўп қаватли уйлар учун ерлар 17,2 гектардан 4 гектаргача камайган.
Ҳудудлар кесимида кўп қаватли уй-жой қурилиши учун сотилган ер майдонларининг асосий қисми Хоразм (5,1 га), Сурхондарё (2,6 га), Наманган (2,6 га) ва Сирдарё (1,5 га) вилоятларига тўғри келган.
Шу билан бирга, якка тартибдаги уй-жой қурилиши учун ер савдоси айрим ҳудудларда юқори улушни сақлаб қолмоқда. Жумладан, республика бўйича бу турдаги ерларнинг 66,6 фоизи Қорақалпоғистон ҳиссасига тўғри келган.
Шунингдек, вертикал урбанизация кучайган ҳудудларда ер нархи юқори шаклланган. Масалан, Наманганда кўп қаватли уйлар учун 1 квадрат метр ернинг ўртача нархи 720 минг сўм, Фарғонада эса 684 минг сўмни ташкил этган. Жиззах ва Қорақалпоғистонда эса бу кўрсаткич анча паст бўлган.
Мутахассисларнинг қайд этишича, ер майдонлари ҳажмидаги ўзгаришлар уй-жой бозоридаги умумий жараёнларга таъсир кўрсатиши мумкин. Ер таклифининг қисқариши қурилиш суръатига таъсир қилиб, вақт ўтиши билан бозордаги нархлар динамикасида акс этиши эҳтимоли бор.
Н.Зиёдуллаева,
ЎзА
