Куни кеча, дунёнинг нуфузли таълим тизимидаги таҳлилий агентлигининг (QS World University Rankings) 2025 йилдаги сарҳисобларига кўра энг нуфузли университетлар рейтинги эълон қилинди. Мазкур глобал рейтинг жаҳондаги олий даргоҳларининг академик обрў, иш берувчилар баҳоси, иқтибослик, илмий ҳамкорлик, хорижий профессорлар ва талабалар сони, барқарорлик каби кўрсаткичларни ҳисобга олган ҳолда эълон қилинади.

Жорий йилда бирваракайига икки олий таълим даргоҳи, яъни Ўзбекистон Миллий университети 781 ўрин ва “Тошкент ирригация ва қишлоқ хўжалигини механизациялаш муҳандислари институти” миллий тадқиқот университети 547 ўрин билан илк бора халқаро ТОП-1000 рейтинггида қайд этилди. 

Ушбу хушхабар юртимизда катта тантана ва хурсандчилик билан қабул қилинди. Чунки, бу омил илм даргоҳларимизнинг кейинги тараққиёт йўлида кўплаб имкониятларни тақдим этади. 

<iframe width="650" height="420" src="https://www.youtube.com/embed/rarCdeglzpk" title="Universitetlarimiz TOP-1000 reytingiga kirishi taʼlim sohasida katta voqea" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Айтиш керакки, ушбу натижалар соҳада бошланган туб ислоҳотларнинг дастлабки мевалари. Зеро, “Ўзбекистон-2030” тараққиёт стратегиясида 15 та олий таълим муассасасини дунёнинг энг нуфузли “Топ-1 000” рейтинггига киритиш белгилаб қўйилган бўлиб, бу борада келгуси йилда яна камида 2та университет ушбу рўйхатдан жой олиши кутилмоқда. 

Тадбирда таъкидланганидек, Мирзо Улуғбек номидаги Ўзбекистон Миллий университети жамоаси бу кўрсаткичга ўз-ўзидан эришгани йўқ. Беш йил аввал ушбу рейтингдан жой олиш учун билим даргоҳи ўз стратегиясини ишлаб чиқиб, таълим беришнинг барча йўналишларини ислоҳ қилди.

Ўтган вақт ичида илмий мақолалар чоп этди, журналларда иқтибослар келтирди, яқин ҳамкорлик орқали дунё олимлари орасида танила бошлади, хорижий талаба ва устозларни ўқув жараёнларга кенг жалб қилди. Пухта ўйланган режа, чексиз меҳнат ўз натижасини берди. Эндиги марра халқаро рейтингда ТОП-500 унивеситетлар қаторидан жой олиш ва бу борада ҳам жамоа ўз олдига янги стратегияларни белгилаб олган. 

Санжар Тошпўлатов, Аброр Содиқов, Улуғбек Тўхтаев (видео), ЎзА