Қирғизистон парламенти кўпчилик овоз билан Ҳисоб палатаси раиси Улуқбек Марипов номзодини республика бош вазирлигига тасдиқлади. Ушбу қарор бугун қонунчилик кенгаши йиғилишида қабул қилинди.

Йиғилишда қатнашган депутатларнинг аксарияти Марипов Бош вазир вазифасини бажаришини маъқуллади. Энди мамлакат қонунчилигига биноан, унинг номзодини парламентнинг тўлиқ таркиби ва президент тасдиқлаши лозим.

Марипов – Қирғизистоннинг амалдаги Ҳисоб палатаси раиси. Аввал Фавқулодда вазиятлар ва Молия вазирликларида турли лавозимларни эгаллаган. Тўрт йил давомида собиқ президент Алмазбек Атамбаевнинг ёрдамчиси бўлиб ишлаган.

Маълумки, Садир Жапаров бошчилигидаги Қирғизистон ҳукумати 21 январь куни Жапаровнинг президент сайловидаги ғалабасидан сўнг истеъфо берган. Шундан буён барча вазирлар, шунингдек Бош вазир Артём Новиков ҳам Вазирлар Маҳкамасининг янги таркиби шакллантирилгунга қадар ўз лавозимларини вақтинча бажарувчи ҳисобланади.