Украина денгиз экспортини тиклашга интилмоқда
Украина Қора денгизда фуқаролик юк ташишни қайта тиклаш бўйича Туркия, Миср ва Ҳиндистон билан музокаралар олиб бормоқда.
- Бир кема бизнинг портимизга, иккинчиси Россия портига боради ва биз уларнинг бирортасига ҳам ҳужум қилмасликка рози бўламиз, -деди Зеленский “Bloomberg” нашрига берган интервьюсида.
Унинг сўзларига кўра, РФ турк, ҳинд ва мисрлик воситачиларнинг мунтазам қўнғироқларига қарамай, бу режага қарши чиқмоқда.
Қора денгиз портлари Украина қишлоқ хўжалиги экспортининг асосий йўналиши ҳисобланади. Улар орқали йилига тахминан 36 миллион тонна дон жўнатилиши мумкин. Август ойидан бери Россиянинг портлар ва кемаларга ҳужумлари туфайли денгиз орқали экспорт тўхтатилган.
- Биз темир йўл юкларининг бу ҳажмини кўтара олмаймиз, -деб таъкидлади Зеленский.
Мамлакат Аграр сиёсати вазирлиги маълумотларига кўра, Украина ҳозирда одатий ҳажмнинг атиги 38 фоизини экспорт қила олади. Ўлка шунингдек, Европа Иттифоқидан “Бирдамлик йўллари” дастурини янгилашни сўрамоқда.
С.Раҳимов, ЎзА
