Украина делегацияси раҳбари Абу-Дабидаги учрашувларни сарҳисоб қилди
Абу-Дабидаги музокаралардан сўнг, Украина делегацияси раҳбари Рустем Умеров томонлар “ҳали кўп қийин ишларни бажаришлари кераклиги, аммо музокаралар жараёнини давом эттириш учун имконият борлигини” таъкидлади.
Унинг сўзларига кўра, асосий натижа кенг кўламли асирлар алмашинуви бўйича келишувга эришилди. Томонлар ҳозирда тафсилотларни якунлаш ва уни амалга ошириш устида ишламоқда. Шунингдек, у тинчликка эришиш ва урушдан кейинги қайта қуриш масалалари ҳам муҳокама қилинганини қайд этди.
Умеровнинг қўшимча қилишича, бунга эришишнинг биринчи қадами низони тугатиш ва Украина учун хавфсизлик кафолатларини бериш бўлиши керак. У шунингдек, музокараларни ташкил этиш ва ўтказишда фаол иштирок этгани учун Қўшма Штатларга миннатдорчилик билдирди.
- БАА музокараларни осонлаштиргани, шунингдек, Буюк Британия, Франция, Германия, Италия, НАТО вакиллари ҳамда Европа Комиссияси билан Абу-Дабида ҳамжиҳатликда ишлаганимиз учун миннатдорман, - деди Р. Умеров.
С.Раҳимов, ЎзА
