Туркиянинг 8 вилоятида махсус хизматлар томонидан олиб борилган амалиётлар натижасида Исроил разведкаси номидан жосуслик фаолиятини амалга оширганликда гумон қилинган 34 киши қўлга олинди, деб хабар бермоқда “Анадолу” ахборот агентлиги.

Уларнинг 15 нафари Исроил ташқи разведка хизмати “Моссад” номидан “халқаро жосуслик” фаолиятини амалга оширганликда гумонланмоқда.

Гумонланувчилар тўрт кунлик сўроқ ва тиббий кўрикдан сўнг Истанбул судига топширилганлиги айтилади хабарда.

Суд 15 нафар гумонланувчини қамоққа олиш, 11 нафар шахсга нисбатан суд назорати чорасини қўллашни тайинлаган. Уларнинг шахсига, қайси давлат фуқаролари эканлигига аниқлик киритилмаган.

Яна 8 нафар гумонланувчи эса Туркиядан депортация қилиш учун Миграция хизматига топширилган.