Таълим соҳасидаги ҳамкорлик алоқаларини янада мустаҳкамлаш мақсадида Туркиянинг Истамбул шаҳрида ўтказилган Туркия – Ўзбекистон учинчи таълим форумида Андижон давлат университети ва Туркиянинг қатор олий таълим муассасалари ўртасида ҳамкорлик меморандумлари имзоланди.

Форум доирасида Андижон давлат университети ректори, техника фанлари доктори Бахтиёржон Акбаралиев Туркиянинг Эге университети ректори Неждет Будак, Мармара университети ректори Мустафо Курт билан икки томонлама ҳамкорликни йўлга қўйиш бўйича музокаралар ўтказди. Музокараларда қатор йўналишларда амалга ошириладиган ишлар муҳокама қилинди, тақдимотлар билан танишилди, истиқболдаги чора-тадбирлар белгилаб олинди. 

[gallery-19576]

Шунингдек, форум давомида университет ректори Туркиянинг Испарта университети ректори Йилмаз Чатал билан ҳам учрашди. Учрашувда икки олий таълим муассасалари ўртасида қўшма таълим лойиҳаларини амалга ошириш, ўқитувчи ва талабаларнинг академик алмашувини йўлга қўйиш, олий ва профессионал таълимда ўқув жараёнларини ҳамкорликда ўтказиш, профессор-ўқитувчилар малакасини ошириш, тажриба алмашиш, ҳамкорликда илмий анжуманлар ва лойиҳаларни ташкил этиш бўйича келишувга эришилиб, меморандум имзоланди. 

Андижон давлат университетининг хорижий, хусусан, Туркия олий таълим муассасалари билан ҳамкорлиги ўқитиш, малакали мутахассислар тайёрлаш жараёнида халқаро меъёр ва андозаларнинг кириб келишига, халқаро интеграциянинг жадал ривожланишига ёрдам беради. 

Ф. Убайдуллаев, ЎзА мухбири