Трампга тегишли гольф клуби яқинида қуролланган шахс қўлга олинди
Жанубий Калифорнияда жойлашган “Trump National” гольф клуби атрофида ҳуқуқни муҳофаза қилиш идоралари ходимлари томонидан қуролланган киши ушланди.
Бу ҳақда Лос-Анжелес округи шериф департаменти ахборот тарқатди.
Маълумотга кўра, федерал агентлар гольф майдони ҳудудида шубҳали шахс пайдо бўлгани ҳақида хабар берган, шундан сўнг гумонланувчи дарҳол қўлга олинган. CNN манбаси айтишича, “ҳозирча ушбу шахс Президент Дональд Трампга суиқасд уюштиришни режалаштирган” деган хулосага келишга ҳеч қандай асос йўқ. Суриштирув давом этяпти. Айнан шу куни Америка етакчиси Республикачилар миллий қўмитаси тадбирида қатнашиш учун Лос-Анжелесга келиши кутилаётган эди. Полиция аниқлашича, қўлга олинган шахс Дауни шаҳрида яшовчи 38 ёшли Женин Жон Тейл. У Эль-Сегундо полиция департаменти томонидан ўғрилик жинояти бўйича гумонланувчи сифатида қидирувда бўлган.
Ф.Яхшибоева, ЎзА
