Трамп Зеленскийга талаб қўйди
Дональд Трамп Украинага кўрсатилган ёрдамни эслатиб, Киев энди Россия билан келишувга эришиши кераклигини билдирди. АҚШ Президенти Вашингтон сарфлаган маблағи эвазига ҳеч қандай натижа олмаганини айтиб, америкалик солиқ тўловчилар сабри тугаётганини таъкидлади.
Трамп Оқ уйда журналистларга Зеленский урушни тугатиш бўйича келишувга аввалроқ эришиши мумкинлигини айтиб, Украинага ёрдам оқибатини “қайғу, ўлим ва улкан молиявий йўқотиш” дея изоҳлади. Мазкур баёнот Вашингтоннинг Киевни қўллаб-қувватлаш масаласига ёндашуви билан боғлиқ баҳсни яна кун тартибига олиб чиқди.
Маълумки, Украина етакчиси Ослода АҚШ махсус вакили Стив Уиткофф билан учрашганидан бери ҳали кўп вақт ўтмади. Учрашувда Финляндия Президенти Александр Стубб ва Норвегия Бош вазири Йонас Гар Стёре ҳам қатнашган. Зеленский музокарани самарали баҳолаб, тинчликка эришиш истаги Киев, Европа ва АҚШ учун умумий эканини билдирди.
Мусулмон Зиё, ЎзА
