“Total Chess World Championship Tour 2026” баҳслари давом этмоқда
Венгриянинг Будапешт шаҳрида шахмат бўйича янги форматда ўтаётган “Total Chess World Championship Tour 2026” мусобақаси “Fast Classic” баҳсларининг иккинчи кунида Нодирбек Абдусатторов “А” гуруҳи 3-4-тури доирасида польшалик Ян-Кшиштоф Дудага қарши дона сурди.
Биринчи партияда ютқазган Абдусатторов иккинчисида қора доналарда рақибини мағлубиятга учратди. Тўрт очко жамғарган Абдусатторов гуруҳда олтинчи поғонадан тўртинчи ўринга кўтарилиб олди.
Гуруҳда 8 очкога эга Алиреза Фирузжа 8 очко билан якка пешқадамга айланган. Ян-Кшиштоф Дуда 7 очко билан иккинчи, АҚШ вакили Левон Аронян 5 очко билан учинчи ўринда ҳаракатланмоқда.
Бугун, 13 ноябрь куни ўтказиладиган 5-6-тур ўйинларида Нодирбек Абдусатторов нидерландиялик Жорден ван Форест билан куч синашади.
“Fast Classic” баҳсларининг ортда қолган икки кунлик ўйинлари натижасида “Б” гуруҳида АҚШ вакили Фабиано Каруана ва “Д” гуруҳида франциялик Максим Вашье-Лаграв 8 очко билан, “С” гуруҳида россиялик Ян Непомняший ва АҚШлик Мартиросян 6 очко билан ўз гуруҳларида етакчиликни давом эттирмоқда.
Ҳар бир гуруҳ ғолиби плей-оффга йўл олади. Қолган иштирокчилар гуруҳдаги ўрнига қараб алоҳида ўринлар учун курашни давом эттиради. Гуруҳларда 2-ўринни эгаллаганлар 5–8-ўринлар, 3-ўринни эгаллаганлар эса 9–12-ўринлар учун беллашади.
Мукофот жамғармаси 650 минг АҚШ долларидан иборат турнирнинг ғолиб ва совриндорлари 20 ноябрь куни маълум бўлади.
Тўлқин Рўзиев,
ЎзА
