Жорий йилнинг 11 февраль куни Тошкент вилояти Юқори Чирчиқ тумани ҳудудидан ўтган 4Р6 “Тошкент – Чорбоғ” автомобиль йўлида хизмат олиб бораётган вилоят ИИББ ЙҲХБ ЙПХБ махсус отряд катта инспектори лейтенант М.Д.Туропов соат тахминан 11:20 ларда Бўстонлиқ тумани йўналишидан ҳаракатланиб келаётган Қашқадарё вилояти рўйхатда турувчи 1992 йилда туғилган фуқаро Р.А.нинг бошқарувида бўлган “Нексия-3” русумли автомашинани хавфсизлик камари учун тўхтатди.
Текширув пайтида ҳайдовчининг оғзидан спиртли ичимлик ҳиди анқиб турганини гумон қилиб, уни икки холис олдида тиббий кўрикдан ўтишга таклиф қилган. Натижада ҳайдовчи Р.А. спиртли ичимлик ичганини тан олади, бироқ тиббий кўрикдан ўтишдан бош тортади. ЙПХ инспектори ушбу ҳолат юзасидан Маъмурий жавобгарлик тўғрисидаги кодекснинг тегишли моддасига кўра, маъмурий баённома расмийлаштирди. Автомашина эса жарима майдонига жойлаштирилган.
Шундан сўнг, ҳайдовчи Р.А. жаримадан озод бўлиш мақсадида баённомани бекор қилиб, атомашинани жарима майдонидан чиқариб бериш эвазига ЙПХ ходимига 1 миллион 500 минг сўм пулни пора тариқасида таклиф қилган. Ҳолат юзасидан ЙПХ ходими билдирги орқали вилоят ИИББ бошлиғига мурожаат қилиб, қонунда белгиланган тартибда чора кўрилишини сўраган.
Шу асосда ўтказилган тезкор тадбир давомида, жорий йилнинг 11 февраль куни Юқори Чирчиқ тумани, Болта қишлоғида жойлашган жарима майдончасида соат 18.20 ларда фуқаро Р.А. ЙПХ ходимига пулларни пора тариқасида берган вақтда ашёвий далиллар билан ушланган.
Мазкур ҳолат юзасидан Юқори Чирчиқ тумани прокуратураси томонидан тергов ҳаракатлари олиб борилмоқда.
А.Мусаев, ЎзА