Тошкент вилояти хабарлари – қисқа сатрларда
Янгийўл шаҳрида Президентимизнинг 2026 йил 26 майдаги “Кичик бизнес субъектларининг ўсиши учун янада қулай иқтисодий ва маъмурий шарт-шароитлар яратиш тўғрисида”ги фармонининг мазмун-моҳиятига бағишланган очиқ мулоқот ва семинар ташкил этилди.
Унда Солиқ қўмитаси ходими И.Севинчов, Тошкент вилоят солиқ бошқармаси бошлиғининг биринчи ўринбосари Р.Турсунбоев ҳамда Янгийўл шаҳар ҳокимининг биринчи ўринбосари А.Исанбаев иштирок этди. Тадбирда янги фармон билан тадбиркорлик субъектлари учун яратилаётган қулайликлар, солиқ маъмуриятчилигидаги енгилликлар ҳамда бизнесни қўллаб-қувватлашга қаратилган муҳим ўзгаришлар ҳақида батафсил маълумот берилди. Жараёнда тадбиркорларни қизиқтирган саволларга мутахассислар томонидан атрофлича жавоб берилди. Шунингдек, бизнес вакилларининг таклиф ва мулоҳазалари тингланиб, уларни амалиётга татбиқ этиш юзасидан фикр алмашилди.
***
Тошкент туманидаги Қуш қўнди ва Сарке маҳаллаларида хавфсиз муҳит яратиш ишлари давом этмоқда. Шу муносабат билан Миллий гвардия Тошкент вилояти бўйича бошқармаси ҳарбий хизматчилари, туман ИИБ ходимлари, маҳаллага бириктирилган профилактика инспекторлари билан биргаликда маҳаллаларда назорат тадбирлари олиб борилди.
Хизмат жараёнида жиноятчиликнинг олдини олиш, фуқаролар шахсига аниқлик киритиш, экологик муҳитни яхшилаш, профилактик назоратни кучайтириш ва аҳоли тинчлигини таъминлашга қаратилган чора-тадбирлар олиб борилди. Бу ўрганишлар хавфсизлик вақт билан чекланадиган вазифа эмас, балки кеча-кундуз давом этадиган узлуксиз масъулият эканлигини кўрсатди.
***
Тошкент вилоят божхона бошқармасининг “Ойбек” чегара божхона постида заргарлик буюмларини юртимизга яширинча олиб киришга бўлган уриниш аниқланди. Жумладан, пиёда ҳолда кириб келган фуқаро текширилганда, унинг кийими ички қисмига хуфиёна жойлаштирилган умумий оғирлиги 83,7 грамм бўлган заргарлик буюмларини олиб киришга урингани фош этилди.
Дастлабки ҳисоб-китобларга кўра, олиб қўйилган заргарлик буюмларининг умумий қиймати 85 миллион сўмни ташкил этмоқда. Ҳозир мазкур ҳолатлар юзасидан божхона текширувлари олиб борилмоқда.
А.Мусаев, ЎзА
