Тошкент шаҳар ҳокими Шавкат Умурзоқов бошчилигидаги ишчи гуруҳ томонидан қиш мавсумидаги юқори юкламалар олдидан электр подстанцияларининг ҳолати ўрганилди.

Жумладан, Шайхонтоҳур, Юнусобод, Чилонзор, Яшнобод, Миробод ва Сергели туманларига ташриф чоғида ускуналарнинг техник ҳолати, шаҳар энергетика инфратузилмасининг электр энергиясини узлуксиз етказиб беришга тайёрлиги кўриб чиқилди.    

Шавкат Умурзоқов масъул тузилмаларга аниқланган камчиликлар, жумладан, ускуналар айрим қисмларининг эскиргани ва назоратни кучайтириш зарурати юзасидан бир қатор топшириқлар берди.    

Шунингдек, ускуналарни модернизация қилиш бўйича кечиктириб бўлмайдиган чора-тадбирларни амалга ошириш, профилактик хизмат ва ташкилий чораларни кучайтириш, юзага келиши мумкин бўлган фавқулодда вазиятларда тезкор ҳаракатланиш чорасини кўриш айтилди.  

Қиш мавсумида шаҳар электр тармоқларининг барқарор ва ишончли ишлашини таъминлаш мақсадида ушбу топшириқлар бажарилиши алоҳида назоратга олингани қайд этилди.    

Ташриф давомида аҳоли мурожаатлари ҳам тингланиб, уларга ечим топиш чоралари кўрилди.  

Гулноза Бобоева,

ЎзА