Кунлар совуши билан Тошкент ҳавосининг юқори даражада ифлосланиши ва бунинг оқибатида инсон саломатлигига салбий таъсир кўрсатувчи омилларнинг кўпайиши халқимизнинг жиддий эътирозига сабаб бўлаётган эди. Шуни инобатга олиб, шу йилнинг 24 ноябрь куни Давлатимиз раҳбарининг “Тошкент шаҳрида экологик вазиятни яхшилаш бўйича кечиктириб бўлмайдиган чора-тадбирлар тўғрисида”ги Президент фармони қабул қилинди.

Фармонда атмосфера ҳавосини ифлосланишининг олдини олишга қаратилган бир қатор чора-тадбирлар белгиланган бўлиб,  экологик вазиятни барқарорлаштириш бўйича махсус комиссия тузилди ва улар жойларда камчиликларни аниқлаш ва бартараф этиш юзасидан фаолият бошладилар.  

Жумладан, Тошкент вилоятининг Зангиота ва Янгийўл туманининг пойтахтга туташ ҳудудларида ҳуқуқни муҳофаза қилувчи ва назорат органларининг ҳамкорликдаги саъй-ҳаракати билан бир қанча экологияга салбий таъсир кўрсатаётган объектлар аниқланди ва бартараф этилди.

Тунги рейд давомида Янгийўл туманида антиқа қурилмаларга дуч келдик. Дарахт кундаларидан кўмир тайёрлаётган тадбиркор яқинда ишни ташкил қилганман, дегани билан ҳеч қандай ҳужжатсиз, экологияга зиён етказувчи бу корхонада иш қоронғу тушиши билан авжига чиқар экан. Қўлбола ускуналардан чиқаётган заҳарли тутун Янгиҳаёт ва Сергели туманига ҳаво йўллари орқали тўғридан-тўғри таъсир қилаётгани, тозалаш ускуналарининг мавжуд эмаслиги корхонанинг ёпилишига ва жарима чоралари кўрилишига сабаб бўлди.  

Жойларда ҳуқуқни муҳофаза қилувчи ва назорат органларининг ҳамкорликдаги рейд тадбирлари давом этмоқда.  

<iframe width="650" height="420" src="https://www.youtube.com/embed/XnsxnA5XjuE" title="Toshkent havosining ifloslanishiga qarshi keskin choralar" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Нишонбой Абдувойитов, ЎзА