Пойтахтимизда ўтказилган V Аксилкоррупция ҳафталиги доирасида Тошкент аксилкоррупция форуми бўлиб ўтди.

Ўзбекистон Республикаси Коррупцияга қарши курашиш бўйича Миллий кенгашининг ташаббуси асосида ҳар йили ўтказиб келинаётган халқаро тадбир “Муҳокамалардан амалий ўзгаришлар сари” шиори остида ташкил этилди. 

Сенатнинг Суд-ҳуқуқ масалалари ва коррупцияга қарши курашиш қўмитаси раиси Абдулҳаким Эшмуродов, Коррупцияга қарши курашиш агентлиги директори Акмал Бурҳонов ва бошқалар мамлакатимизда коррупцияга қарши курашиш бўйича тизимли ишлар амалга оширилаётганини таъкидлади. 

Президентимиз Шавкат Мирзиёевнинг Коррупцияга қарши курашиш бўйича Миллий кенгашининг кенгайтирилган мажлисида бу иллатга қарши муросасиз курашиш бўйича қўйган топшириқлари ижроси юзасидан амалий ишларга қадам қўйилди. Очиқлик  тамойили барча давлат идораларида таъминланиши, шаффоф давлат хизматлари кўрсатиш, давлат харидларида ноқонуний ҳолатларга йўл қўймаслик бўйича салмоқли натижаларга эришилмоқда. 

Европа Иттифоқининг Ўзбекистондаги делегацияси вақтинча бошқарувчи вакили Рената Робел Ўзбекистон раҳбарияти томонидан кейинги пайтда қўллаб-қувватлашга арзийдиган муҳим ташаббуслар илгари сурилаётганини қайд этди. Фуқаролар фаровонлигига қаратилган ислоҳотлар, очиқлик ва шаффофлик тамойилларини жорий этишга эътибор шулар жумласидандир. Президент Шавкат Мирзиёевнинг жорий йил 5 мартдаги коррупцияга қарши курашиш бўйича чиқишида билдирган фикрлари, манфаатлар тўқнашувини бартараф этиш бўйича ҳаракатлар, жамоат ташкилотларининг жамиятдаги ўрни кучайтирилаётгани – буларнинг барчаси коррупцияга барҳам беришдаги муҳим қадамлар. Бу йўналишда биз ҳамкорлар эканимиздан мамнунман. Яқинда Брюсселда ҳамкорликни кенгайтириш бўйича яна бир тарихий шартнома имзоланиши кутилмоқда. 

Форум Ўзбекистон Республикаси Коррупцияга қарши курашиш агентлиги томонидан ЕИ, БМТ Тараққиёт дастури, GIZ, АҚШ Давлат департаменти, ИҲТТ, БМТнинг  Гиёҳванд моддалар ва жиноятчилик бўйича бошқармаси, ЕХҲТ, Конрад Аденауэр фонди ҳамда Қатар давлатининг Қонун устуворлиги ва коррупцияга қарши курашиш маркази каби йирик халқаро ҳамкорлар кўмагида ташкил этилди.  

Унда хорижий делегациялар, давлат органлари, фуқаролик жамияти ва оммавий ахборот воситаларининг 250 нафардан ортиқ вакили, Германия, Словения, Грузия, Литва, Саудия Арабистони, БАА, Миср, Мўғулистон, Индонезия, Озарбайжон каби 20 дан ортиқ давлатнинг аксилкоррупция идоралари раҳбарлари ва вакиллари, шунингдек, қатор маҳаллий ва хорижий экспертлар иштирок этди.

Айтиб ўтиш керакки, ҳафталик доирасида Ўзбекистон Бизнес-омбудсмани билан ҳамкорликда Халқаро Бизнес-омбудсманлар йиғилиши ва IV Бизнесда ҳалоллик форуми ўтказилди. 

Transparency International Latvia ва ИҲТТ билан ҳамкорликда “Давлат харажатлари мониторинги ва ҳисобдорликни таъминлаш” мавзусида нодавлат ташкилотлари учун семинар-тренинг ташкил этилди. 

БМТ Тараққиёт дастури, ЕИ ва ИҲТТ кўмагида коррупция ҳақида хабар берувчи шахсларни ҳимоя қилишга оид қонун лойиҳасининг тақдимотига бағишланган махсус тадбир бўлиб ўтди.  

Бундан ташқари, ЕХҲТ билан ҳамкорликда “Шаффофлик ва очиқлик – коррупцияга қарши курашиш воситаси сифатида” мавзусида семинар ҳамда БМТ Тараққиёт дастури ва Европа экспертлари кўмагида 3 та ҳудудда эксперимент тариқасида амалга оширилаётган “Ҳалол ҳудудлар” (“Island of Integrity”) лойиҳаси тақдимот қилинди. 

Яна бир аҳамиятли жиҳати шундаки, ушбу форум доирасида 2027 йилда БМТнинг Коррупцияга қарши конвенциясига аъзо давлатлар конференциясининг 12-йиғилишини Ўзбекистонда ўтказиш ташаббуси илгари сурилди. 

Ушбу ташаббус мамлакатимизнинг коррупцияга қарши курашишдаги халқаро ролини минтақавий даражадан глобал даражага кўтаришга қаратилган навбатдаги муҳим сиёсий қадам ҳисобланади.

Замонавий тараққиёт ва глобал ўзгаришлар талабидан келиб чиқиб, бу йилги форумда ҳам коррупцияга қарши курашишнинг долзарб масалалари кун тартибига қўйилди. Жумладан, асосий муҳокама сессиялари “Коррупцияга қарши сунъий интеллект”, “Комплаенс назоратининг янги даражаси” ва “Коррупцияга қарши ўқитиш” мавзуларига бағишланди. 

Фаол мулоқот ва қизғин муҳокамалар якунига кўра, коррупцияга қарши курашиш сиёсатини такомиллаштириш, чора-тадбирлар самарадорлигини ошириш ва халқаро ҳамкорликни кучайтириш бўйича аниқ таклифлар ишлаб чиқилди.

Тошкент аксилкоррупция форумининг декларацияси қабул қилинди. 

<iframe width="650" height="420" src="https://www.youtube.com/embed/nrsJqgMiL64" title="Toshkent aksilkorrupsiya forumi korrupsiyaga qarshi kurashishda xalqaro darajadagi yakdillikni" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Норгул Абдураимова,

Аслиддин Алижонов (сурат),

Нишонбой Абдувоитов (видео), ЎзА мухбирлари