Фарғона вилоятининг Қўштепа туманида туғилган Дилноза Абдурасулова бугун Тошкент ахборот технологиялари университети Фарғона филиали дастурий инжиниринг кафедраси ассистенти сифатида фаолият юритмоқда. Қаҳрамонимз бу йил "Зулфия" номидаги давлат мукофоти билан тақдирланди.

Дилноза ўзининг ташаббуси билан университетда "Дастурчи қизлар" тўгарагини ташкил этган. Мазкур тўгарак орқали у қизларнинг дастурлаш бўйича билим ва кўникмаларини ривожлантириш, уларни ахборот технологиялари соҳасида фаол бўлишларига замин яратишни мақсад қилган. Хусусан, "Winners" номли жамоаси билан биргаликда кўплаб халқаро дастурлаш лойиҳаларида иштирок этиб, қизларнинг жамият тараққиётига ҳисса қўша олишини амалда исботлаган.

— Ёшлик — орзу ва интилишларга қанот бўлувчи давр, — дейди Дилноза. — Афсуски, кўпчилик ёшлар келажагини олдиндан тасаввур қила олмайди, мақсад қўйишда қийналади. Шу боис, мактаб давридан бошлаб уларни касбга йўналтириш, қизиқиш ва қобилиятларини аниқлаш жуда муҳим. Мен ҳам дастлаб бу йўналишни танлашда иккиланиб қолганман. Ҳатто ота-онамга "тикувчиликка кетяпман" деб, аслида информатика тўгарагига бориб келган пайтларим бўлган. "Уддалай олармиканман?" деган қўрқувни енгишим учун эса бироз вақт керак бўлди.

Бугунги кунда Дилноза бир нечта хорижий тилларни пухта ўзлаштирган. У халқаро UNDP ва Фарғона РТМ ҳамкорлигида ташкил этилган хакатонда "Энг фаол қиз" йўналишида ғолибликни қўлга киритди. Шунингдек, "IT Ladies" ташкилоти томонидан ўтказилган "IT Star" лойиҳаси ва Yandex ҳамда "Technovation Girls" ҳамкорлигидаги халқаро хакатонларда ҳам юқори натижаларга эришган.

<iframe width="791" height="433" src="https://www.youtube.com/embed/nQnyfAUX9HU" title="“Tikuvchilikka ketyapman” deb informatika toʻgaragiga qatnagan qiz – bugun mukofot sohibasi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳайё Тошқораева, ЎзА