Тошкент шаҳрида давом этаётган Халқаро теннис федерацияси мусобақалар тақвимидан жой олган W15 таснифига кирувчи турнирда яккалик баҳсларнинг биринчи давра учрашувлари якунланди.
"Олимпия шаҳарчаси" кортларида ўтган илк босқичда ҳамюртимиз Александра Бармичева латвиялик Одета Панасани 7:5, 6:0 ҳисобида таслим қилди ва иккинчи босқичда литвалик Лаима Владсон билан рақобатлашадиган бўлди.
Шуни таъкидлаб ўтиш лозимки, 15 ёшни қарши олган теннисчимиз мусобақанинг энг ёш иштирокчисига айланди. У 2010 йил 25 июлда туғилган бўлиб, нафақат ёшлар, балки катталар ўртасидаги мусобақаларда ҳам ишончли ўйин намоён этмоқда. Александра 2025 йилда катталар ўртасидаги мусобақаларда ўз дебютини амалга оширди.
Унинг мазкур мусобақадаги иштироки спорт фаолиятида муҳим босқич ҳисобланади. Бу эса Тошкент шаҳри бутун дунёдан иқтидорли ва умидли теннисчилар учун ўсиш майдонига айланаётганини яққол тасдиқлайди.
Бугун, 23 октябрь куни яккаликлар ўртасида иккинчи давра учрашувлари бўлиб ўтади.
Жавоҳир Тошхўжаев,
ЎзА