Теннисчи қизларимизнинг жаҳон рейтингидаги ўрни қандай?
Аёллар тенниси ассоциацияси (WTA) томонидан янгиланган жаҳон рейтинги эълон қилинди. Қувонарлиси, ушбу жадвалдан 7 нафар теннисчимиз жой олди.
Хусусан, мамлакатимизнинг биринчи рақамли теннисчиси Камилла Раҳимова 1164 балл билан 45-ўринни эгаллаган бўлса, Мария Тимофеева 952 балл тўплаб, 72-ўриндан жой олди. Полина Кудерметова эса етти поғона юқорилаб, 852 очко жамғарган ҳолда 86-ўринга кўтарилди.
Севиль Юлдашева 12 поғона юқорилаб, 916-ўринни эгаллади. Милана Масленкова эса 25 поғона олдинга силжиб, 1309-ўринга кўтарилди. Лайма Владсон 12 поғона пастлаб, 608-ўриндан жой олган бўлса, Дарья Шубина 1472-ўринга тушди.
Жаҳон рейтингида Қозоғистон вакили Елена Рибакина 8099 очко билан пешқадамликни давом эттирмоқда. Беларусь теннисчиси Арина Соболенко иккинчи, россиялик Мирра Андреева эса учинчи ўринни банд этган. АҚШ вакиллари Коко Гофф ва Жессика Пегула тўртинчи ҳамда бешинчи поғоналардан жой олди. Украинадан Элина Свитолина олтинчи, чехиялик Каролина Мухова еттинчи ўринда бормоқда.
Жавоҳир Тошхўжаев,
ЎзА
