Теннис: Севил Йўлдошева Ҳиндистонда иккинчи бўлди
Ҳиндистоннинг Самбҳажи Нагар шаҳрида хотин-қизлар ўртасида ўтган нуфузли теннис турнирида ҳамюртимиз Севил Йўлдошева жуфтлик баҳсларида вице-чемпионга айланди.
Аниқроқ айтадиган бўлсак, Севил Йўлдошева Халқаро теннис федерацияси томонидан ташкил этилган “Women’s World Tennis Tour W15” мусобақасининг жуфтликлар ўртасидаги баҳсида германиялик Анастасия Купарев билан тандем ҳосил қилди.
Севил ва Анастасия турнирнинг чорак финалида мезбон теннисчилар Аишвария Жадҳав ва Акрути Сонкусар жуфтлигини, ярим финалда эса бошқа бир ҳиндистонлик теннисчилар Соҳа Содиқ ва Мадҳурима Савантни енгди ва финал босқичига йўл олди. Сўнгги ҳал қилувчи финал учрашувида улар қозоғистонлик Жибек Куламбаева ҳамда нейтрал теннисчи Екатерина Яшина дуэтига қарши ўйнади ва кутилмаганда имкониятни бой бериб қўйди.
Шу тариқа, мусобақа совриндорига айланган Севил Йўлдошева ҳамда Анастасия Купарев ташкилотчилар томонидан 515 АҚШ доллари пул мукофоти ва 10 рейтинг очкосига эга бўлди. Турнир чемпионлари бўлган Екатерина ва Жибек эса 955 АҚШ доллари ҳамда 15 рейтинг очкоси билан тақдирланди.
Жавоҳир Тошхўжаев, ЎзА
