Тайланд ва Камбоджа ўт очишни тўхтатишга келишиб олди
Тайланд ва Камбоджа 50 дан ортиқ кишининг ўлимига сабаб бўлган ва икки мамлакатда 500 мингдан ортиқ тинч аҳолини кўчиришга мажбур қилган шиддатли жанглардан сўнг ўт очишни тўхтатиш режими қайта тикланиши ҳақида қўшма баёнот имзолади.
Таъкидланишича, ўт очишни тўхтатиш тартиби шанба куни маҳаллий вақт билан соат 12:00 да кучга кирди.
Тайланд мудофаа вазири Наттҳафон Наркфанит ва унинг камбоджалик ҳамкасби Ти Сейха томонидан имзоланган келишув Жануби-Шарқий Осиёдаги икки қўшни давлат ўртасида йиллар давомида энг ҳалокатли бўлган 20 кунлик жангларни якунлади.
Келишув доирасида Тайланд ҳукумати ўт очишни тўхтатиш режими тўлиқ сақлаб қолинганидан 72 соат ўтгач, аввалги тўқнашувларда асирга олинган 18 нафар камбоджалик аскарни қайтаришга рози бўлди.
Шу билан бирга, томонлар кескинликни юмшатиш мақсадида провокацион ҳаракатларни амалга оширмаслик ва ёлғон маълумотларни тарқатмаслик бўйича келишиб олган.
Маълумот ўрнида: Тайланд ва Камбоджа чегарасида оғир ҳарбий техника, артиллерия ва авиация қўлланган қуролли тўқнашувлар 7 декабр куни қайта бошланган эди. Можаро қўшниларнинг 800 километрлик чегарасидаги ҳудудий баҳслардан келиб чиққан, бу ерда иккала томон ҳам қадимий ибодатхоналарга даъво қилиб келади. Тайланд Қуролли кучлари маълумотига кўра, 22 декабрь ҳолатига 22 нафар ҳарбий ҳалок бўлган, 120 дан ортиқ киши яраланган. Камбоджа расмийлари эса 30 нафар тинч аҳоли вакили вафот этгани ва 87 киши жароҳат олганини маълум қилган.
Ў.Алимов, ЎзА
