Қашқадарё вилояти Косон тумани Қуйибоғ маҳалласида фаолият олиб бораётган тадбиркор Зарифа Қурбонова тикувчилик соҳасида узоқ йиллик тажрибага эга. Бугунга қадар ҳунари ортидан обрў топиб, бора-бора тикувчилик йўналиши бўйича тадбиркорлик фаолиятини ҳам йўлга қўйди. Ўз ҳунари сирларини бошқаларга улашишдан ҳам сира чарчамайди.

– Бугунги кунда тадбиркорлик фаолиятим билан бир қаторда туманда ташкил этилган мономарказда уч ойлик касбга тайёрлаш курсида хотин-қизларга тикувчилик ҳунарини ҳам ўргатиб келяпман, – дейди  Зарифа Қурбонова. – Ҳунарни яхши ўрганган хотин-қизларни тикувчилик цехимда иш билан ҳам таъминлаяпман. Яқинда ногиронлиги бор хотин-қизларни ҳам тикувчилик ҳунарига ўргатишни йўлга қўйдик ва тикувчилик цехимизда уларнинг ҳам бандлигини таъминлашга ҳаракат қиляпмиз. Жорий йилда бу йўналишдаги ишларимизни янада кенгайтиришни мақсад қилганмиз.  

Тадбиркорнинг таъкидлашича, айни пайтда маҳалладаги 10 нафар хотин-қизнинг бандлигини таъминлаган. 4 нафарининг ногиронлиги бор. Тикувчилик цехида буюртмага қараб ҳар хил турдаги аёллар, эркаклар ва болалар либослари тикилмоқда.  

Ўлмас Баротов, ЎзА мухбири